اتىراۋ وبلىسىندا 23 جۇمىسشى تۇسكى استان ۋلانىپ قالدى دەپ حابارلايدى "ادىرنا" ۇلتتىق پورتالى "قازاقپاراتقا" سىلتەمە جاساپ.
وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە، 3 ماۋسىمدا گاز-حيميا كەشەنىنىڭ قۇرىلىسىن جۇرگىزىپ جاتقان «Bazis Construction» جشس-نىڭ 23 جۇمىسشىسى اسحانادا تۇسكى استان ۋلانعان. ولار №2 وبلىستىق ينفەكتسيالىق اۋرۋحاناسىنا جاتقىزىلعان.
"ينفەكتسيالىق اۋرۋحاناعا 3 ماۋسىمدا ساعات 19:45-تە 21 جۇمىسشى، 4 ماۋسىمدا ساعات 01:00-دە تاعى 2 ادام ءتۇستى. اۋرۋحاناعا جاتقان ناۋقاستاردىڭ بارىندە ۋلانۋ بەلگىلەرى بايقالدى. ناۋقاستار باس اينالۋ، قۇسۋ، السىزدىك جانە ديارەيا بەلگىلەرىنە شاعىمدانعان" - دەپ حابارلادى باسقارمانىڭ ءباسپاسوز قىزمەتى. جۇمىسشىلار «Bazis Construction» جشس-نىڭ اسحاناسىندا تاماقتانعان. الدىن الا قويىلعان دياگنوز – تاعامدىق توكسيكوينفەكتسيا.
«جۇمىسشىلارعا تۇسكى استا مانپار، بۇرشاق سورپاسى، سيىر ەتىنەن دايىندالعان تاعام، قايناتىلعان شۇجىق، پىسىرىلگەن تاۋىقتىڭ ءتوس ەتى، قايناتىلعان قاراقۇمىق، ماكارون، قىرىققابات سالاتى ۇسىنىلعان. ولار ۋلانۋدى تۇسكى اسپەن بايلانىستىرادى»، - دەپ ءمالىم ەتتى باسقارمانىڭ ءباسپاسوز قىزمەتى.
ەسكە سالا كەتەلىك، بۇدان بۇرىن اتىراۋ وبلىسىندا 47 ادام سۋشيدەن ۋلانىپ، ءدامحانا جۇمىسى توقتاتىلعان بولاتىن.
"ادىرنا" ۇلتتىق پورتالى.
