24 جانە 25 شىلدە كۇندەرى جامبىل مەن الماتى وبلىستارىنداعى رەسپۋبليكالىق ماڭىزى بار اۆتوجولداردا ەكى اۋىر جول-كولىك وقيعاسى ورىن الدى، دەپ حابارلايدى "ادىرنا" ۇلتتىق پورتالى.
بۇل تۋرالى «قازاۆتوجول» ۇلتتىق كومپانياسىنىڭ ءباسپاسوز قىزمەتى حابارلاعان.
24 شىلدە كۇنى ساعات 09:40-تا جامبىل وبلىسى مويىنقۇم اۋدانىنداعى قاشقانتەڭىز ستانتسياسى ماڭىندا، «استانا – قاراعاندى – الماتى» اۆتوجولىنىڭ 451-شاقىرىمىندا Toyota Alphard ماركالى كولىك ەكسكاۆاتور-پوگرۋزچيكپەن سوقتىعىستى. الدىن الا مالىمەت بويىنشا، جۇرگىزۋشى جىلدامدىق پەن قاۋىپسىز قاشىقتىقتى ساقتاماعان، سالدارىنان جول اپاتى ورىن العان. اپات سالدارىنان ءتورت ادام قازا تاۋىپ، ەكى ادام جاراقات الدى.
25 شىلدەدە ساعات 10:15-تە، الماتى وبلىسى جامبىل اۋدانى سامسى اۋىلى ماڭىندا، KAZ-06 رەسپۋبليكالىق اۆتوجولىنىڭ 81+500 شاقىرىمىندا Toyota Alphard كولىگى دوڭعالاقتى تراكتورمەن سوقتىعىستى. بۇل جول ۋچاسكەسىندە سول ساتتە جول جوندەۋ جۇمىستارى جۇرگىزىلىپ جاتقان. قاجەتتى بارلىق ۋاقىتشا بەلگىلەر قويىلعان، الاڭدا 9 جۇمىسشى مەن 5 تەحنيكا بولعان.
الدىن الا مالىمەت بويىنشا، جۇرگىزۋشى جىلدامدىقتى اسىرعان، جۇك كولىگىن وڭ جاقتان باسىپ وزۋعا ارەكەت جاساپ، قورشالعان ايماققا كىرىپ كەتكەن. ناتيجەسىندە جول جوندەۋ تەحنيكاسىمەن سوقتىعىسقان. اپات سالدارىنان 6 ادام قازا تاۋىپ، ونىڭ ىشىندە بىرەۋى جول قىزمەتكەرى بولعان. تاعى ەكى ادام جاراقات العان.
ايتا كەتەيىك، اي باسىندا، 5 شىلدە كۇنى قاراعاندى وبلىسىنداعى اقشاتاۋ كەنتى ماڭىندا قايعىلى جول اپاتى بولعان ەدى.
وبلىستىق پوليتسيا دەپارتامەنتىنىڭ مالىمەتىنشە، بالقاش باعىتىندا كەلە جاتقان Kia Sedona جۇرگىزۋشىسى جول بەلگىلەرىنە ءمان بەرمەي، باسقا كولىكتى باسىپ وزعان. ونىڭ سالدارىنان كولىك جوندەۋ ءجۇرىپ جاتقان اۋماققا ۇشىپ كەلىپ، كەيىن كولىك قورشاۋعا سوعىلعان. سوقتىعىسۋدان كەيىن كولىك ورتەنىپ، 7 ادام وقيعا ورنىندا جان تاپسىردى.
