قالاعا جاقىن كىشكەنتاي اۋىلدا تۇراتىن قىز قاراپايىم وتباسىندا ومىرگە كەلدى. ونىڭ اتا-اناسى جۇمىس ىستەپ، ەكى بالاسىن قولدارىنان كەلگەنشە ءوسىردى. قىز بالا 13 جاسقا كەلگەندە اكە-شەشەسى اجىراسىپ كەتتى. ەر ادام باسقا ايەلمەن كوڭىل جاراستىرىپ، بولەك تۇرسا، ءجاسوسپىرىمنىڭ اناسى الكوگولگە تاۋەلدى بولىپ، ىشىمدىككە سالىنادى.
وسىنداي جاعدايلارعا بايلانىستى 13 جاستاعى قىزدى ناعاشىلارى ۋاقىتشا قامقورلىققا الدى. ناتيجەسىندە، قىز وڭتۇستىك استاناداعى قايىرىمدىلىق مەكەمەلەرىنىڭ بىرىنە تۇسەدى. وتباسىلىق جاعدايدى ەستىگەن اكىمشىلىك ونى مەكەمەگە تەز قابىلداپ، مەكتەپكە وقۋعا جىبەرەدى.
الايدا ءجاسوسپىرىمنىڭ تۋىستارى قايىرىمدىلىق دەپ اتالاتىن مەكەمەنىڭ استىرتىن «مەدرەسە» رەتىندە جۇمىس ىستەيتىنىن جانە «سۇلەيمەنشىلەر» دەپ اتالاتىن ءدىني اعىمنىڭ ءبىرى ەكەنىن بىلمەگەن. بۇل جاماعات اتاۋى ولاردىڭ كوشباسشىلارى سۇلەيمەن حيلمي تۋناحان ەسىمىمەن اتالادى.
انىقتاما: سۇلەيمەنشىلەر— يسلامنىڭ راديكالدى ءتۇرىن، پانتۇركيزمدى، ءپانيسلاميزمدى ناسيحاتتايتىن تۇرىك ءدىني سەكتاسى. قوزعالىس بۇكىل يسلام الەمىنىڭ تۇركيانىڭ اينالاسىنداعى ءبىر مەملەكەت «ۇلى تۇران» اياسىندا بىرىگۋىن جاقتايدى. ۇيىمنىڭ قىزمەتىنە الەمنىڭ بىرقاتار ەلىندە تىيىم سالىنعان.
العاشقى كەزدە وقىتۋشىلار قىزعا جاقسى قاراپ، ونى حيدجاب كيۋگە مىندەتتەمەگەن. ءجاسوسپىرىم باسقالارمەن بىرگە اراب ءتىلىن ۇيرەنۋ ساباقتارىنا ۇزدىكسىز قاتىسىپ، كەشكى ۋاقىتتا «ۇستازدىڭ» ءارتۇرلى ءدىني تاقىرىپتارداعى ۋاعىزدارىن تىڭداعان. ۋاقىت وتە كەلە ۇستازدار باسقا شاكىرتتەرى ارقىلى قىزعا «سەنى تاماقتاندىرىپ، تەگىن باسپانامەن قامتاماسىز ەتىپ جاتىرمىز، ۇستازىڭ ءۇشىن ورانا دا المايسىڭ» دەگەن اڭگىمە ارقىلى قىسىم كورسەتە باستاعان. بۇنداي پسيحولوگيالىق شابۋىلداردان كەيىن قىز «حيدجاب» كيىپ، وسى قوزعالىستىڭ ىلىمدەرىنە تولىعىمەن ەنىپ كەتەدى. ناماز وقۋمەن قاتار، ولار «رابىتا» ءراسىمى ارقىلى مارقۇم بولعان شەيح سۇلەيمەن حيلمي تۋناحاننىڭ كيەلى رۋحىمەن بايلانىس ورناتىپ، يسلام دىنىنە قايشى كەلەتىن ءداستۇرلى ەمەس ىرىم-تىيىمداردى بىرلەسىپ ورىنداعان. مۇعالىمدەر ستۋدەنتتەرگە جاقىندارىمەن جانە باسقا ادامدارمەن وقۋ ورنىنىڭ قابىرعاسىندا ءدىندى وقىتۋ تۋرالى سويلەسۋدىڭ قاجەتى جوق ەكەنىن ايتىپ، كەيبىر جاعدايدا قورقىتىپ، ولاردىڭ اراسىندا تەرىس پيعىلدى ادامدار بار دەپ تۇسىندىرەدى. قۋانىشقا وراي، قىزدىڭ تۋىستارى قايىرىمدىلىق ۇيىمىنىڭ جاسىرىن ارەكەتتەرىن دەر كەزىندە ءبىلىپ، قىز بالانى سول جەردەن الىپ كەتكەن. وسى وقيعادان كەيىن مۇعالىمدەر، ءتىپتى مەكەمە ديرەكتورى قىزدىڭ تۋىستارىنا قايتا-قايتا كەلىپ، وقۋىن جالعاستىرۋدى سۇراعان. بويجەتكەن دە مەكەمەگە قايتا ورالعىسى كەلەتىنىن جەتكىزگەن، ويتكەنى مەكتەپ بىتىرگەن سوڭ ۇستاز تۇركياعا تەرەڭىرەك ءبىلىم الۋعا جىبەرەمىن دەپ ۋادە ەتكەن. ءجاسوسپىرىمنىڭ ايتۋىنشا، باسقا ستۋدەنتتەر مەن ۇستازدار وعان بالاعات سوزدەر جازىپ، قيامەت كۇنى ۇستاز سۇلەيمەن تۋناحان كومەكتەسپەيتىنىن ايتقان. وسى جاعدايدان كەيىن بويجەتكەن قوعامنان الشاقتاپ، بۇل ۇستازداردىڭ نەلىكتەن ەكىجۇزدى ەكەنىن تۇسىنە المايدى. وسىنداي قىزدىڭ ومىرىندەگى قيىن قىستاۋ كەزدە جەرگىلىكتى يمامدار ءداستۇرلى يسلام تۋرالى تولىق اقپارات بەرىپ، دۇرىس جول كورسەتتى.
قازىر ۋاقىتتا، بويجەتكەن مەگاپوليستەگى مەملەكەتتىك ۋنيۆەرسيتەتتە وقيدى. ول جاستار مەن اتا-انالاردى بالالارىن كۇماندى قايىرىمدىلىق مەكەمەلەرىنە جىبەرمەۋدى ەسكەرتەدى جانە ونىڭ اڭگىمەسى باسقالارعا ۇلگى بولادى دەپ ويلايدى.
