90-نان استام پانسيوناتى بار قايىرىمدىلىق قورىن زەرتتەگەن جۋرناليست تىڭ دەرەكتەرمەن ءبولىستى، دەپ حابارلايدى “ادىرنا” پورتالى Almaty.tv تىلشىسىنە سىلتەپ.
جۋرناليست اسقاربەك قازانعاپ «سۇلەيمەنشىلەر» تۋرالى اشىق زەرتتەۋ جۇمىستارىن جۇرگىزگەن. ال كەيىننەن ولارعا قاتىستى باعدارلامادان كەيىن كيبەرشابۋىل ۇدەي تۇسكەنىن ايتادى. مامىر ايىندا جارىق كورگەن باعدارلامادان كەيىن ونىڭ تەلەفونىنا ءتۇرلى قورقىتۋ-ۇركىتۋ سىندى سوزدەر كەلگەن.
جۋرناليست سوزىنشە، باسى داۋعا قالعان قايىرىمدىلىق قورىنىڭ سويىلىن سوققاندار ءوزىن بالاعاتتاپ، قورقىتىپ، جالعان جالامەن سوتقا بەرىپ ۇلگەرگەن.
«ايتامىز» توك-شوۋىنىڭ جۇرگىزۋشىسى باعدارلامادا پانسيونات تاربيەلەنۋشىسىنىڭ، ءدىنتانۋشىلار مەن ءمۇفتيات وكىلدەرىنىڭ باسىن قوسىپ، قايىرىمدىلىق قورى مەن «سۇلەيمەنشىلەر» جاماعاتى تۋرالى تاقىرىپتى اشىق تالقىلاعان. باعدارلاماعا شۋ شىققان مەكەمەنىڭ وكىلدەرى دە شاقىرىلادى. الايدا مەكەمە وكىلدەرى ءتۇسىرىلىم كۇنى كەلمەيتىنىن حابارلاپ، پىكىرتالاستان باس تارتقان كورىنەدى.
– «جىبەك جولىنىڭ» اقپارات ءبولىمىنىڭ باسشىسىنا شىققان كەزدە، 2-3 كۇن بۇرىن باعدارلامانىڭ تۇسىرىلەتىنىن ەسكەرتتىم. «ەرتەڭ «نەگە ايتپادىڭدار، نەگە حابارلاسپادىڭدار؟" دەپ باعدارلامانى جوققا شىعارۋدىڭ قاجەتى جوق. ايتارىڭىز بولسا، باعدارلاماعا كەلىڭىزدەر، پىكىرىڭىزدى ماماندارعا ايتىڭدار، اق-قاراسىن سول جەردە ارا-جىگىن اجىراتايىق» دەپ تەلەفونمەن بايلانىستىم. الايدا ولار توك-شوۋ بولاتىن كۇنى كەلە المايتىنىن ايتتى. سەبەبىن تۇسىندىرە المادى», – دەدى جۋرناليست اسقاربەك قازانعاپ
ونىڭ ايتۋىنشا، مەكەمە جاقتاستارى پانسيونات ىشىندەگى جاسىرىن ارەكەتتەردى جاسىرماي ايتقان تاربيەلەنۋشىنىڭ ويىن وزگەرتىپ، وزىنە قارسى قويىپ ۇلگەرگەن. بىراق بۇل ارەكەت جۋرناليست زەرتتەۋىنە ەش كەدەرگىسىن كەلتىرمەگەن. سەبەبى اسقاربەك قازانعاپتىڭ قولىندا بارلىق دالەل بولعان. پوليتسيا دەپارتامەنتى قايىرىمدىلىق قورىنا قاتىستى قىلمىستىق ءىس قوزعاعالى اقپارات بەتتەرىندە «سۇلەيمەنشىلەر» تۋرالى جازبا دا كوبەيگەن.
قۇزىرلى ورگان دەرەگىنشە، قايىرىمدىلىق قورىنا قارايتىن مۇنداي پانسيوناتتار تەك الماتىدا عانا ەمەس. ەلدىڭ بىرقاتار وزگە وڭىرىندە دە كەزدەسەدى. جالپى سانى 90-نان اسادى. بۇعان دەيىن ولار مۇفتياتپەن مەموراندۋم جاساسۋ ارقىلى جۇمىس ىستەپ كەلگەن. سونىڭ اياسىندا ءدىني وقۋلاردى باسقارما بەكىتكەن يمامدار ارقىلى وتكىزۋگە مىندەتتەلگەن ەكەن. الايدا قمدب وكىلدەرى حابارلاعانداي، قايىرىمدىلىق مەكەمەسى ءۇي ىشىنەن ءۇي تىگىپ, كەلىسىمدى ساقتاماعان. زاڭ بۇزىلعانى انىقتالعاننان كەيىن، مەموراندۋمنىڭ كۇشى جويىلعان.
بۇگىندە بالالار پانسيوناتىنىڭ اتىن جامىلىپ جۇمىس ىستەيتىن قايىرىمدىلىق مەكەمەلەرگە قاتىستى قىلمىستىق ءىس تەرگەۋدە. ولار كامەلەتكە تولماعان بالانى ءوز-وزىنە قول جۇمساۋعا يتەرمەلەدى جانە باسقا دا قىلمىس جاسادى دەگەن كۇدىككە الىنىپ وتىرعانىن ايتا كەتەيىك. بۇعان دەيىن قۇزىرلى ورگان وكىلدەرى تەكسەرۋ كەزىندە وقيعا ورنىنان «قازاقستاندا ەكسترەميستىك دەپ تانىلعان جانە تاراتۋعا تىيىم سالىنعان ماتەريالدار تابىلعانىن دا» حابارلاعان بولاتىن.
