استانادا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ ءححى وتىرىسى باستالدى، - دەپ حابارلايدى "ادىرنا" ءتىلشىسى.
وتىرىس پارلامەنت سەناتىنىڭ توراعاسى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ مەڭگەرۋشىسى ماۋلەن اشىمباەۆتىڭ جەتەكشىلىگىمەن وتۋدە. ول پرەزيدەنت قاسىم-جومارت توقاەۆتىڭ جيىنعا قاتىسۋشى الەمدىك دىندەر كوشباسشىلارىنا ارناعان ارنايى قۇتتىقتاۋىن ايتتى.
«بارشاڭىزدى الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ 21-ءشى وتىرىسىنىڭ اشىلۋىمەن شىن جۇرەكتەن قۇتتىقتايمىن. بۇل باستاما قىسقا ۋاقىت ىشىندە ءوزىنىڭ وزەكتىلىگىن دالەلدەپ، وركەنيەتارالىق ديالوگتىڭ ماڭىزدى الاڭىنا اينالدى. فورۋم دىندەر اراسىنداعى دوستىق پەن كەلىسىمدى نىعايتۋعا، بۇكىل ادامزاتتىڭ وزەكتى ماسەلەلەرىن شەشۋگە جانە توزىمدىلىكتى ناسيحاتتاۋعا ارقاشان ءوز ۇلەسىن قوسىپ كەلەدى.»، - دەلىنگەن قۇتتىقتاۋدا.
مەملەكەت باسشىسى اتاپ وتكەندەي، كەزدەسۋلەر بارىسىندا الەمنىڭ تۇكپىر-تۇكپىرىنەن كەلگەن رۋحاني كوشباسشىلار الەم جۇرتشىلىعىن تولعاندىرىپ جۇرگەن وزەكتى ماسەلەلەردى تالقىلاپ، بەيبىتشىلىكتى ساقتاۋ جانە ءوزارا سىيلاستىقتى ارتتىرۋ جونىندە وي ءبولىستى.
"بۇگىندە گەوساياسي جاعداي ۋشىعىپ، ءتۇرلى قاۋىپ-قاتەرلەر كۇشەيىپ كەلەدى. قازىرگى قيىن كەزەڭدە ادامگەرشىلىك، مەيىرىمدىلىك، باۋىرلاستىق، جاۋاپكەرشىلىك قاعيداتتارىنىڭ ماڭىزى ارتىپ كەلەدى. سونداي-اق حالىقارالىق قاۋىپسىزدىكتىڭ جاڭا جۇيەسىن قالىپتاستىرۋ ماڭىزدى ماسەلەگە اينالىپ وتىر. ول ءۇشىن بەيبىتشىلىككە شاقىراتىن دۇنيەجۇزىلىك قوزعالىس قاجەت. سونىمەن قاتار دىندەر ماڭىزدى ءرول اتقارادى. وسى ماسەلەلەردى شەشۋگە رۋحاني كوشباسشىلار ۇلكەن ۇلەس قوسۋدا. وسى ماقساتتا حاتشىلىق سەزدىڭ وتىرىسى ۇيىمداستىرىلادى. قازاقستان ارقاشان دىنارالىق جانە كونفەسسياارالىق ىنتىماقتاستىقتى قولدايدى. الەمدىك جانە ءداستۇرلى دىندەر سەزى حاتشىلىعىنىڭ 21-ءشى وتىرىسىنىڭ بارلىق جەتەكشىلەرىنە جەمىستى جۇمىس تىلەيمىن»، - دەلىنگەن مەملەكەت باسشىسىنىڭ مالىمدەمەسىندە.
