دايىندىق ءبىر اي بويى ءجۇردى. وقۋشىلار كۇندە جينالىپ، ستسەناريدى پىسىقتاپ وتىردى
نۇر-سۇلتان، 25 مامىر – Sputnik, ارمان اسقار. بۇگىن ەلوردانىڭ №58 مەكتەپ-گيمنازياسىنىڭ تۇلەكتەرى ءۇشىن سوڭعى قوڭىراۋ سوعىلدى. سالتاناتتى جيىنعا قالا اكىمى باقىت سۇلتانوۆ تا كەلەمىن دەگەن. بىراق شارانىڭ باستالۋىنا بىرنەشە مينۋت قالعاندا ءباسپاسوز قىزمەتى اكىمنىڭ اۋىرىپ قالعانىن حابارلادى. ونىڭ ورنىنا ماليكا بەكتۇروۆا كەلدى. Sputnik قازاقستان تىلشىسى دە سوڭعى قوڭىراۋعا قاتىسىپ، وقۋشىلاردىڭ "اكىم كەلەدى" دەگەن كۇنگە قالاي دايىندالعانىن كورىپ قايتتى.
"اكىممەن كەزدەسپەگەنىمىزگە وكىنبەيمىز"
بۇگىنگى جيىندا ءبارى بولدى. مەكتەپ تۇلەكتەرى ءان دە ايتتى، بي دە بيلەدى. باستاۋىش سىنىپ وقۋشىلارىنىڭ ونەرىن تاماشالاپ، مەكتەپكە قالاي كەلگەندەرىن ەسكە الدى. وسىدان كەيىن ءداستۇرلى ۆالسقا شىعىپ، شىر اينالدى.
تاعى وقىڭىز: ءبىلىم مينيسترلىگى تۇلەكتەر كەشىن وتكىزۋگە بايلانىستى ۇسىنىس ايتتى
سالتاناتتى جيىندا اكىمنىڭ العىس حاتتارى دا تابىستالدى. بىراق ونىڭ ءبارىن قالا باسشىسىنىڭ ورىنباسارى ماليكا بەكتۇروۆا بەردى. اكىمنىڭ العىسىنا ءبىر عانا وقۋشى يە بولدى. ول – وقۋ ۇزدىگى اباي ەسەنباەۆ. Sputnik قازاقستان تىلشىسىنە بەرگەن سۇحباتىندا اباي العىس حاتتى اكىمنىڭ قولىنان الماعانىنا ەش كوڭىلى تۇسپەگەنىن جەتكىزدى.
"وندا تۇرعان ەشتەڭە جوق. بولاشاقتا كونفەرەنتسيالاردا نەمەسە باسقا دا جيىنداردا كەزدەسەمىز دەپ ويلايمىن. نەگىزى، ءبىز الدىڭعى كۇنى دارىندى بالالارمەن بىرگە اكىممەن جۇزدەسكەنبىز. ەكى جىل بۇرىن اسەت يسەكەشەۆپەن دە كەزدەستىك. سوندىقتان ونداي كەزدەسۋلەر ءالى دە بولىپ تۇرادى", - دەيدى ەسەنباەۆ.
مەكتەپ بۇل جيىنعا ءبىر اي بويى دايىندالعان ەكەن. وقۋشىلار كۇندە جينالىپ، ستسەناريدى پىسىقتاپ وتىردى.
ء"بىز بۇل شاراعا قاتتى دايىندالدىق. كۇندە جينالدىق. ءبارى ويداعىداي بولدى دەپ ويلايمىن. ەندى، مەكتەپپەن قوشتاسقىم كەلمەيدى. وسى جەردە 11 جىل بويى وقىدىق. مۇعالىمدەردى، دوستارىمدى قيمايمىن. ءبىرتۇرلى اۋىر بولىپ تۇر", - دەدى تاعى ءبىر تۇلەك تولعاناي قىلىشەۆا.
13 يننوۆاتسيالىق جوبا جاسالدى
№58 مەكتەپ-گيمنازياسىن اكىمگە كورسەتەتىندەي ءبىراز جەتىستىكتەرى بار ەكەن. بيىل وقۋدى 70 تۇلەك ءتامامداپ وتىر. ولاردىڭ ىشىندە رەسپۋبليكالىق جارىستاردا توپ جارىپ، رەسەيدە وتكەن عىلىمي كونفەرەنتسيادا ءبىرىنشى ورىن العاندار دا بار.
"بيىل 70 تۇلەكتىڭ ىشىندە 2 التىن بەلگى جانە 5 ۇزدىك اتتەستاتتان ۇمىتكەر بولىپ وتىر وسى وقۋ جىلىندا مەكتەبىمىزدە ەكوتەحنيكالىق باعىتتا 13 يننوۆاتسيالىق جوبا ىسكە اسىرىلدى", - دەيدى مەكتەپ ديرەكتورى سامال نۋگۋمانوۆا.
"بۇرىن ءبارى عارىشكەر بولعىسى كەلسە، قازىر ولاي ەشكىم ايتپايدى"
بۇگىندە مەكتەپتە بىرنەشە زەرتحانا بار. ماسەلەن، عىلىم مەن تەحنولوگيا زەرتحاناسىندا وقۋشىلار ءوز قولىمەن شاعىن زاۋىت-فابريكالاردى جاساي الادى. ال زىمىران قۇراستىرۋ كابينەتىندە جەڭىل راكەتالاردى جيناپ، اسپانعا ۇشىرۋعا مۇمكىندىك بار.
"STEM+ زەرتحاناسىندا بالالار روبوتتاردى عانا ەمەس، شىن ومىردە بولاتىن زاۋىتتاردىڭ شاعىن نۇسقاسىن دا قۇراستىرا الادى. سوسىن قازاقستاندا بايقوڭىر سياقتى ۇلكەن عارىش ايلاعى بار. بىراق بىزدە عارىش سالاسى اقساپ تۇر عوي. بۇرىن ءبارى عارىشكەر بولعىسى كەلەتىن. قازىر ولاي ەشكىم ايتپايدى. بالالاردىڭ وسى ىنتاسىن وياتۋ ءۇشىن راكەتا مودەلدەۋ كابينەتى اشىلدى", - دەپ اتاپ كورسەتتى فيزيكا مۇعالىمى ەرعالي ناۋاتبەك. بۇگىن ول دا اكىمىڭ العىسىنا يە بولدى.
وقۋشىلار كوكتەيل مەن سوۋس جاسايدى
مەكتەپتە جاسىل تەحنولوگيالار كابينەتى بار. ول جەردە وقۋشىلار وسىمدىكتەرگە سان الۋان تاجىريبە جاسايدى. گيدروپونيكالىق قۇرىلعىنىڭ نەگىزىندە قۇلپىنايدى دا ءوسىرىپ وتىر. ال ءبىر توپ وقۋشى كوكتەيل مەن سوۋستى جاساپ شىققان. بۇگىن ونى كەلگەن بارلىق قوناقتارعا تاراتتى.
ال مەكتەپ دالىزىندە مىنانداي سەنىم جاشىگىن بايقاۋعا بولادى. مۇعالىمدەردىڭ ايتۋىنشا، وقۋشىلار وعان ءوز ارىز-شاعىمدارىن، سونداي-اق، ۇسىنىستارىن سالىپ وتىرادى. پسيحولوگ ماماندارعا حات جازاتىن بالالار دا بولادى.
ايتپاقشى، مەكتەپكە اكىم كەلەدى دەگەننەن كەيىن كوممۋنالدىق قىزمەتتەر اينالانىڭ ءبارىن تازالاپ قويدى. ءتىپتى، گۇلزارعا جاتپايتىن ءشوپتى دە قىرقىپ، تەگىستەپ تاستادى. الايدا جولدى جوندەۋدى ۇلگەرمەدى.
