قوستاناي وبلىسىندا سوۆەت كەزىنەن قالعان وناماستيكالىق اتاۋلاردى اۋىستىرۋ ءالى جالعاسىپ كەلەدى. سول كەزدەگى ساياسي جۇيە بايلاپ تاڭعان اتاۋدىڭ كوپشىلىگى سونشالىق – ءبىر اتاۋ ونداعان مارتە قايتالانا قويىلعان. سونىڭ ءبىرى – لەنين اتىنداعى قاپتاعان كوشە.
"ادىرنا" ۇلتتىق پورتالىندا "كسرو-نىڭ 60 جىلدىعى" مەن "لەنين" كوشەلەرىن جارىقتاندىرۋعا 3 405 892.86 تەڭگە ءبولىندى" دەگەن ماتەريال جاريالانعان ەدى. سوعان وراي قوستاناي وبلىستىق قوعامدىق دامۋ باسقارماسى سول جاريالانىمعا قاتىستى جاۋاپ بەردى، دەپ حابارلايدى «ادىرنا» ۇلتتىق پورتالىنىڭ ءتىلشىسى.
اتالعان ماقالادا جاڭا قازاقستاننىڭ «كسرو-نىڭ 60 جىلدىعى» مەن «لەنين» كوشەلەرىن جارىقتاندىرىپ جاتقانى قۇلاققا جاعىمسىز ەستىلەتىنى، تاۋەلسىزدىك العانىمىزعا 30 جىلدان اسىپ كەتسە دە، قوستاناي وبلىسى سۇيەگى باياعىدا قۋراپ قالعان لەنيندى، سول لەنين قۇرعان كسرو-نى سانادان وشىرە الماي وتىرعانى سىنعا ىلىككەن بولاتىن.
وسى جاريالانىمعا بايلانىستى ادىرنا ۇلتتىق پورتالى قوستاناي وبلىستىق قوعامدىق دامۋ باسقارماسىنا: "وبلىس اۋماعىنداعى "كسرو-نىڭ 60 جىلدىعى", "لەنين" سەكىلدى جۇزدەگەن كسرو-دان قالعان كونە اتاۋلاردى وزگەرتۋ جۇمىسى قاشان قولعا الىنادى؟ وبلىستاعى ونوماستيكالىق احۋال قانداي؟ بيىلعى جىلى قانشا ەلدىمەكەن، قانشا كوشە قازاقىلاندى؟" دەگەن ساۋالدار جولداعان ەدى.
ول سۇراقتارعا وبلىستىق مادەنيەت باسقارماسى جاۋاپ بەردى.
"مادەنيەت باسقارماسى قوستاناي وبلىسى اۋماعىنداعى قازىرگى تاڭداعى ونوماستيكالىق احۋال بويىنشا حاتىڭىزبەن مۇقيات تانىسا وتىرا كەلەسىنى مالىمدەيدى.
وبلىسىمىزدا ونوماستيكالىق جۇمىستار نورماتيۆتىك-قۇقىقتىق اكتىلەرگە جانە جوعارى تۇرعان مەملەكەتتىك ورگان بەكىتكەن ارنايى كريتەريلەرگە سايكەس جۇزەگە اسىرىلۋدا.
1.قازاقستان رەسپۋبليكاسىنداعى ونوماستيكالىق جۇمىستاردى ۇيىمداستىراتىن ادىستەمەلىك ۇسىنىمدار تالابىنا سايكەس كوشەلەردىڭ اتاۋلارىن وزگەرتۋدەن جارتى جىل بۇرىن تۇرعىندارمەن دايەكتى ءتۇسىندىرۋ جۇمىستارى جۇرگىزىلىپ وتىرادى.
وسىدان 5 جىل بۇرىن وبلىس اۋماعىندا لەنين، كومسومولسكايا، سوۆەتسكايا، وكتيابرسكايا، 40,50,60,70 لەت وكتيابريا كوشە اتاۋلارى بولعان. سودان بەرگى ۋاقىتتا يدەولوگيالىق تۇرعىدان ەسكىرگەن لەنين اتىنداعى 21 كوشەنىڭ، وكتيابرسكايا – 12, سوۆەتسكايا – 8, كومسومولسكايا – 7 اتاۋلارى وزگەرتىلدى. بۇل باعىتتاعى جۇمىس الداعى ۋاقىتتا ءوز جالعاسىن تاباتىن بولادى.
2.وڭىرىمىزدە ونوماستيكالىق جاڭارۋ، يدەولوگيالىق تۇرعىدان ەسكىرگەن اتاۋلاردى ۇلتتىق تانىمعا جاقىن، تاريحي اتاۋلارمەن اۋىستىرۋ بويىنشا زيالى قاۋىم وكىلدەرى، تاريحشى عالىمدار، ولكەتانۋشىلار، وبلىستىق ونوماستيكا كوميسسياسىنىڭ مۇشەلەرى، قوعامدىق بىرلەستىكتەردىڭ جەتەكشىلەرى، بۇقارالىق اقپارات قۇرالدارى، بلوگەرلەردىڭ قاتىسۋىمەن كونفەرەنتسيالار، سەمينارلار، دوڭگەلەك ۇستەلدەر وتكىزىلىپ، تۇرعىندار اراسىندا كەڭ اقپاراتتىق-ءتۇسىندىرۋ جۇمىستارى جۇرگىزىلەدى.
وسىعان بايلانىستى وڭىرىمىزدەگى ونوماستيكالىق جاڭارۋ ماسەلەسى بويىنشا ءتۇسىندىرۋ جۇمىستارىن كۇشەيتۋ ماقساتىندا 2023 جىلعى 12-15 ماۋسىم ارالىعىندا قوعام قايراتكەرى دوس كوشىمنىڭ، وبلىستىق ونوماستيكا كوميسسياسىنىڭ مۇشەسى قالقامان جاقىپتىڭ قاتىسۋىمەن اۋليەكول، قارابالىق، فەدوروۆ، دەنيسوۆ، جىتىقارا، ۇزىنكول اۋداندارى، قوستاناي قالاسىنداعى تۇرعىندارمەن، ءىرى كاسىپورىندار قىزمەتكەرلەرىمەن كەزدەسۋلەر ۇيىمداستىرىلىپ وتكىزىلدى.
2017 جىلدان بەرى وبلىس بويىنشا بارلىعى 168 اتاۋ وزگەرتىلىپ، ونىڭ ىشىندە 1 اۋدان، 1 قالا، 8 اۋىلدىق وكرۋگ، 8 اۋىل، 119 كوشە، 31 وبەكت ۇلتتىق تانىمعا جاقىن اتاۋلاندى.
سونىڭ ىشىندە قازاقستان رەسپۋبليكاسى پرەزيدەنتىنىڭ جارلىقتارىمەن تاران اۋدانى بەيىمبەت مايلين اۋدانى (24.06.2019ج. №29), قوستاناي اۋدانىنىڭ ورتالىعى زاتوبول كەنتى اۋداندىق ماڭىزداعى توبىل قالاسى بولىپ وزگەرتىلدى (02.01.2020ج.№ 235).
2023 جىلدىڭ باسىنان بەرگى ۋاقىتتا وبلىس بويىنشا 3 كوشە جانە 3 اۋىل، 1 اۋىلدىق وكرۋگ، 4 مەكتەپتىڭ اتاۋلارى وزگەرتىلدى" دەگەن جاۋاپ كەلدى.
ارينە، قوستانايدىڭ قازاقىلانۋى مەملەكەتتىك يدەولوگيا ءۇشىن كەزەك كۇتتىرمەيتىن ماسەلە. الداعى ۋاقىتتا قوستانايلىق شەندىلەر بۇل ماسەلەگە سەرگەك قارايدى دەپ ۇمىتتەنەمىز!
قانات بىرلىكۇلى
«ادىرنا» ۇلتتىق پورتالى
