قوستانايدا ۇيلەنۋ تويىندا قوناقتار ءبىر-ءبىرىن پىشاقتاپ كەتكەن. بولعان جانجالعا قاتىسقان ادامداردى پوليتسيا ۇستادى. بۇل تۋرالى Polisia.kz مالىمدەدى، دەپ حابارلايدى “ادىرنا” ۇلتتىق پورتالى.
1 قازانعا قاراعان ءتۇنى پوليتسياعا قوستاناي مەيرامحانالارىنىڭ ءبىرىنىڭ جانىندا بىرنەشە ادام توبەلەسىپ جاتقانى تۋرالى حابار كەلىپ ءتۇستى. شاقىرۋعا دەرەۋ كەلگەن پوليتسەيلەر قوستاناي قالاسى پب سولتۇستىك بولىمىنە 6 قاتىسۋشىنى جەتكىزدى. ءىس جۇرگىزۋ كەزىندە بولعان وقيعانىڭ ءمان-جايى انىقتالدى.سالدارىنان ەر ادامنىڭ ءبىرى وزگەگە پىشاق سالعان. جاۋاپ الىنعان 56 جاستاعى ەر ادام قاساقانا پىشاقتاۋ فاكتىسىن جوققا شىعارمايدى، دەلىنگەن حابارلامادا.
وقيعا سالدارىنان 27 جاستاعى جاراقات العان ادام اۋرۋحاناعا جاتقىزىلدى. پوليتسيا قر قك-ءنىڭ 106-بابى 1-بولىگى (دەنساۋلىققا قاساقانا اۋىر زيان كەلتىرۋ) جانە قر قك 293-بابىنىڭ 3-بولىگى (بۇزاقىلىق) بويىنشا سوتقا دەيىنگى ەكى تەرگەۋدى بىردەن باستادى. قازىرگى ۋاقىتتا ءىستىڭ ءمان-جايلارىن جان-جاقتى، تولىق انىقتاپ جاتىر. قىلمىستىق ءىستى تەرگەۋ بارىسى قوستاناي وبلىسى پد باسشىلىعىنىڭ باقىلاۋىنا الىندى.
