اسىرەدىنشىلدىككە ادام نەگە ساقتىقپەن قارايدى؟ اركىمنىڭ ءارتۇرلى سەبەبى بار. مەنىڭ دوسىم بار ەدى، سامبودان سپورت شەبەرى، وقىعان-توقىعانى كوپ، ءبىلىمدى بولاتىن. قالادان ءزاۋلىم ءۇي سالىپ، بيزنەس اشتى. بىردە دوسىم جول اپتىنا ءتۇسىپ باسىن رۋلگە قاتتى ۇرىپ الادى. ەكى يىعىنا ەكى كىسى مىنەتىن ەڭگەزەردەي جىگىت اۋەلدە مۇنى ەلەمەيدى. كەيىن ءبىر-ەكى مارتە كوزى بۇلدىراپ، قۇلاپ قالىپتى. سودان بارىپ،باسىن تۇسىرسە، ۇرىلعان جەرگە ءتۇيىر قان ۇيىعان ەكەن، اينالاسى سۋلانا باستاپتى. مىقتى دەگەن دارىگەرلەرگە كورىندى. ءبارى ”تۇك ەمەس، اسقىندىرماي سىلىپ تاستاۋ كەرەك” - دەدى. ماقۇل! دوسىم كەلىسىپ، دايىندالا باستاعان. جوسپارلى مەرزىمى بەلگىلەندى.
وپەراتسياسىنا كەرەك اقشاسىن رەتتەپ ءجۇردى… مىنە وسى كەزدە ساقالدى سايتان ساپ ەتە قالدى. ءحال سۇراۋ ءۇشىن ۇيىنە بارعاندا باسىنا اق تاقيا كيگەن قاۋعا ساقالدى كورگەندە كۇدىكتەنبەپ ەدىك. كەلەسى بارعاندا دوسىمىزدىڭ ءوزى سونداي تاقيا كيىپ، ساقال قويا باستاعانىنان سەكەمدەندىك. مىنالار وپەراتسيا دەگەن بوس ءسوز، ساداقا بەرسەڭ قۇداي قۇلان تازا ايىقتىرادى دەدى. سونداي تيتىمدەي دۇنيەگە بولا باسىمدى اشتىرام با؟ دەپ بەت قاراتپايدى. دوستار جينالىپ بارىپ بىرنەشە رەت سويلەستىك، بولمادى. وپەراتسيا مەرزىمى ءوتىپ، جايىنا قالدى. بىردە بارسام ۇيىندە جوق. كەلىنشەگى: ول كىسى مەشىتتەن شىقپايدى، ەندى ءدىن ناسيحاتتايمىن دەپ ەل ارالاپ كەتتى، دەدى. ءۇش اي… ءار كۇنى ساناۋلى پەندە ءۇش اي قاڭعىپ ءجۇردى. اللانىڭ ساقتانعاندى عانا ساقتايتىنىن ۇمىتىپ، ۇستازىنا قۇدايداي سەنىپ، جانىنا مەدەت تىلەپ ءدىن تاراتتى. ەمگە دەگەن اقشاسىن مەشىتكە قۇيدى، قۇدايى تاراتتى.
بىردە ءوزى ۇيگە كەلدى: سەكە، مەن قاجىلىققا كەتىپ بارامىن، رەنجي بەرمەي اق جول تىلەشى، - دەدى. دەرتى اسقىنىپ بارا جاتقانى جۇزىندە تۇر ەدى. ەت پىسكەنشە اڭگىمەلەستىك، بولمايدى. اقىرى ول ءدىني باسقارمانىڭ ءبىر بولمەسىندە قۇدايى تاماق بەرىپ، شىعارىپ سالدىق. سول ساتتە ۇستازىنا: سىرقات جاندى سونشا نەگە سۇيرەيسىڭ؟ - دەپ قاتقىلداۋ سويلەدىك. ءبىزدىڭ جىگىتتەردىڭ الارا قاراعانىنا شىداماي “ۇستاز” تەز تايىپ تۇردى. ال دوسىمىز پارىزىن وتەۋگە اتتاندى…
ۇيالى تەلەفون شىر ەتتى، دوسىم ەكەن. قاجىلىقتان ورالىپتى.
- قايداسىڭ؟
- اۋىلعا كەتىپ بارامىن.
- قالادان شىعىپ كەتتىڭ با؟
- جوق.
- سول جەتكەن جەرىڭدە تۇرا قالشى، قازىر بارامىن؟!
كەزدەستىك. ءزامزام سۋىن، ءتاسپى اكەپتى. كۇلىمدەپ، قولىما ۇستاتتى. كوزىندە ءبىر مۇڭ بار. ونىسىن كەلەسى اپتا، قاجى-دوسقا ۇيدەن ءدام تاتىرعاندا ايتتى. قاعبانى اينالىپ جۇرگەندە قاپىرىققا شىداماي تالىپ قالىپتى. ەسىمدى جيسام ءمايىتحانادا ەكەنمىن، بەتىمە اق شۇبەرەك جاۋىپ، باشپايىما فاميليام جازىلعان بيركا ءىلىپ قويىپتى، كوپ ولىكتىڭ ورتاسىندا دەنەم شوشىپ جاتىپ مەنىڭ مەككەم - كەگەنىم ەكەنىن ءتۇسىندىم. ارابتىڭ قۇمىندا قالعاننان قورىقتىم، اقشوقىدان اۋىلىما قاراپ جاتسام ارمانىم بار ما، ەڭ قۇرىعاندا قازاعىم بەت سيپاپ، توپىراق الىپ تۇرادى عوي، - دەدى ول. كۇدەر ۇزبە دەدىك. دارىگەرگە قايتا بارىپ ەدىك كۇتىمسىز جۇرگەندىكتەن كەسەل تەز اسقىنىپ، ىسىك ميدىڭ ەكى بولىگىنە تامىر جايىپتى. سۋرەتكە قاراعان كوپ حيرۋرگ قورىقتى، تەك اقشولاقوۆ قانا تاۋەكەل ەتتى. شيپاگەرلىگىمەن تانىلعان ماماننىڭ ءوزى دوسىمىزدىڭ ءومىرىن جارتى جىلعا عانا ۇزارتا الدى… داڭقتى بالۋان قىرىققا جەتپەي جىعىلدى. “ۇستازدار” جىعىپ بەردى. ولاردى ءبىز وپەراتسيا كەزىندە دە، دوسىمىز توسەك تارتىپ جاتىپ قالعاندا دا، جەر بەسىككە بولەگەندە دە كورگەن جوقپىز. ساداقانى قالتاسىنا سىقاي سالعان شاكىرتكە توپىراق سالۋعا كەلمەدى. كىم ءبىلسىن، ولاردا توپىراق سالۋ حارام شىعار…
ولاردىڭ ميسسياسى ادام ناۋقاستان قۇلاعاندا ءتامام بولعان. بۇنى نەگە جازدىم، ءدىندارلار ءۇمىت ۇرلاۋشىعا اينالدى. وسى وقيعادا وڭشەڭ شالا ساۋاتتى دۇمشە شيبورىشە شۋلاپ ءجۇرىپ، دوسىمىزدىڭ، ونىڭ اعايىن، دوس-جارانىنىڭ ءۇمىتىن ۇرلادى. الەم ادەبيەتىن، قازاق ادەبيەتىن قوپارا وقىعان، تىلدەسكەندى شەشەندىگىمەن تاڭ قالدىراتىن ازاماتتى از ۋاقىتتا سۋقاراڭعى سوقىر سەنىمگە ارباپ تۇسىرگەن زىمياندىقتارىنا قايران قالاسىڭ. مەشىتكە بارساڭ جاستارعا ءبىلىم ال، ساباق وقى، ساباقتان قالما دەمەيدى، اقىرەتىڭدى ويلا، ناماز وقى، نامازدان قالما دەيدى. كەمبريدجدى قايتەسىڭ، اقىرى كورگە كىرەسىڭ. قازۇۋ-عا بارىپ ءبىلىم العانشا “ۇستازعا” بارىپ ۋاعىز تىڭدا، ءدىن تارات، داۋعات جاسا. ءوستىپ جاستاردىڭ الدىنداعى ارمان قاقپاسىن جاۋىپ، ەرتەدەن-كەشكە دەيىن مەشىت اۋلاسىنان شىقپايتىن لەك دايىنداپ جاتىر. بۇل مۇسىلماندىق پا؟
