Ásiredinshildikke adam nege saqtyqpen qaraıdy? Árkimniń ártúrli sebebi bar. Meniń dosym bar edi, sambodan sport sheberi, oqyǵan-toqyǵany kóp, bilimdi bolatyn. Qaladan záýlim úı salyp, bıznes ashty. Birde dosym jol aptyna túsip basyn rýlge qatty uryp alady. Eki ıyǵyna eki kisi minetin eńgezerdeı jigit áýelde muny elemeıdi. Keıin bir-eki márte kózi buldyrap, qulap qalypty. Sodan baryp,basyn túsirse, urylǵan jerge túıir qan uıyǵan eken, aınalasy sýlana bastapty. Myqty degen dárigerlerge kórindi. Bári ”Túk emes, asqyndyrmaı sylyp tastaý kerek” - dedi. Maqul! Dosym kelisip, daıyndala bastaǵan. Josparly merzimi belgilendi.
Operaııasyna kerek aqshasyn rettep júrdi… Mine osy kezde saqaldy saıtan sap ete qaldy. Hál suraý úshin úıine barǵanda basyna aq taqııa kıgen qaýǵa saqaldy kórgende kúdiktenbep edik. Kelesi barǵanda dosymyzdyń ózi sondaı taqııa kıip, saqal qoıa bastaǵanynan sekemdendik. Mynalar operaııa degen bos sóz, sadaqa berseń Qudaı qulan taza aıyqtyrady dedi. Sondaı tıtimdeı dúnıege bola basymdy ashtyram ba? dep bet qaratpaıdy. Dostar jınalyp baryp birneshe ret sóılestik, bolmady. Operaııa merzimi ótip, jaıyna qaldy. Birde barsam úıinde joq. Kelinshegi: Ol kisi meshitten shyqpaıdy, endi din nasıhattaımyn dep el aralap ketti, dedi. Úsh aı… ár kúni sanaýly pende úsh aı qańǵyp júrdi. Allanyń saqtanǵandy ǵana saqtaıtynyn umytyp, ustazyna Qudaıdaı senip, janyna medet tilep din taratty. Emge degen aqshasyn meshitke quıdy, qudaıy taratty.
Birde ózi úıge keldi: Seke, men qajylyqqa ketip baramyn, renjı bermeı aq jol tileshi, - dedi. Derti asqynyp bara jatqany júzinde tur edi. Et piskenshe áńgimelestik, bolmaıdy. Aqyry ol Dinı basqarmanyń bir bólmesinde qudaıy tamaq berip, shyǵaryp saldyq. Sol sátte ustazyna: Syrqat jandy sonsha nege súıreısiń? - dep qatqyldaý sóıledik. Bizdiń jigitterdiń alara qaraǵanyna shydamaı “ustaz” tez taıyp turdy. Al dosymyz paryzyn óteýge attandy…
Uıaly telefon shyr etti, dosym eken. Qajylyqtan oralypty.
- Qaıdasyń?
- Aýylǵa ketip baramyn.
- Qaladan shyǵyp kettiń ba?
- Joq.
- Sol jetken jerińde tura qalshy, qazir baramyn?!
Kezdestik. Zámzám sýyn, táspi ákepti. Kúlimdep, qolyma ustatty. Kózinde bir muń bar. Onysyn kelesi apta, qajy-dosqa úıden dám tatyrǵanda aıtty. Qaǵbany aınalyp júrgende qapyryqqa shydamaı talyp qalypty. Esimdi jısam máıithanada ekenmin, betime aq shúberek jaýyp, bashpaıyma famılııam jazylǵan bırka ilip qoıypty, kóp óliktiń ortasynda denem shoshyp jatyp meniń Mekkem - Kegenim ekenin túsindim. Arabtyń qumynda qalǵannan qoryqtym, Aqshoqydan aýylyma qarap jatsam armanym bar ma, eń quryǵanda qazaǵym bet sıpap, topyraq alyp turady ǵoı, - dedi ol. Kúder úzbe dedik. Dárigerge qaıta baryp edik kútimsiz júrgendikten kesel tez asqynyp, isik mıdyń eki bóligine tamyr jaıypty. Sýretke qaraǵan kóp hırýrg qoryqty, tek Aqsholaqov qana táýekel etti. Shıpagerligimen tanylǵan mamannyń ózi dosymyzdyń ómirin jarty jylǵa ǵana uzarta aldy… Dańqty balýan qyryqqa jetpeı jyǵyldy. “Ustazdar” jyǵyp berdi. Olardy biz operaııa kezinde de, dosymyz tósek tartyp jatyp qalǵanda da, jer besikke bólegende de kórgen joqpyz. Sadaqany qaltasyna syqaı salǵan shákirtke topyraq salýǵa kelmedi. Kim bilsin, olarda topyraq salý haram shyǵar…
Olardyń mıssııasy adam naýqastan qulaǵanda támam bolǵan. Buny nege jazdym, dindarlar úmit urlaýshyǵa aınaldy. Osy oqıǵada óńsheń shala saýatty dúmshe shıbórishe shýlap júrip, dosymyzdyń, onyń aǵaıyn, dos-jaranynyń úmitin urlady. Álem ádebıetin, qazaq ádebıetin qopara oqyǵan, tildeskendi sheshendigimen tań qaldyratyn azamatty az ýaqytta sýqarańǵy soqyr senimge arbap túsirgen zymııandyqtaryna qaıran qalasyń. Meshitke barsań jastarǵa bilim al, sabaq oqy, sabaqtan qalma demeıdi, aqyretińdi oıla, namaz oqy, namazdan qalma deıdi. Kembrıdjdi qaıtesiń, aqyry kórge kiresiń. QazUÝ-ǵa baryp bilim alǵansha “ustazǵa” baryp ýaǵyz tyńda, din tarat, daýǵat jasa. Óstip jastardyń aldyndaǵy arman qaqpasyn jaýyp, erteden-keshke deıin meshit aýlasynan shyqpaıtyn lek daıyndap jatyr. Bul musylmandyq pa?
