قاسىم-جومارت توقاەۆ تاجىكستانعا جۇمىس ساپارى بارىسىندا حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى باسشىلارى كەڭەسىنىڭ وتىرىسىنا قاتىستى، دەپ حابارلايدى «ادىرنا» ءتىلشىسى.
جيىندا مەملەكەت باسشىسى ۇيىمدى ودان ءارى دامىتۋعا قاتىستى ۇسىنىستارىن ورتاعا سالدى. ايتۋىنشا، قوردىڭ ۇيىمدىق قۇرىلىمى مەن شارتتىق-قۇقىقتىق بازاسىن جەتىلدىرۋ پروتسەسىن تەزىرەك اياقتاۋ ماڭىزدى ماسەلە بولىپ قالا بەرەدى.
«قوردىڭ باسقارماسى مەن اتقارۋشى كوميتەتىنىڭ وكىلەتتىلىگىن جانە جاۋاپكەرشىلىگىن كەڭەيتكەن ءجون. مەملەكەتارالىق سۋ شارۋاشىلىعىن ۇيلەستىرۋ كوميسسياسىن مەملەكەتارالىق سۋ-ەنەرگەتيكالىق كوميسسيا رەتىندە قايتا قۇرۋدى ۇسىنامىز. بۇل شارالار قوردىڭ تيىمدىلىگىن ارتتىرار ەدى. ايماقتاعى بارلىق ەلدىڭ يرريگاتسيا، گيدروەنەرگەتيكا جانە ەكولوگيا سالالارىنداعى مۇددەلەرىن ەسكەرە وتىرىپ، ورتالىق ازيانىڭ سۋ-ەنەرگەتيكا رەسۋرستارىن ءتيىمدى پايدالانۋ ءۇشىن ۇزاق مەرزىمدى ءارى ورنىقتى ايماقتىق ىنتىماقتاستىق مەحانيزمىن قۇرۋ كەرەك. ءبىزدىڭ ويىمىزشا، حالىقارالىق سۋ-ەنەرگەتيكا كونتسورتسيۋمى وسىنداي مەحانيزمنىڭ ءرولىن اتقارا الار ەدى. سونداي-اق ارال تەڭىزى باسسەينىندەگى سۋ رەسۋرستارىن ەسەپكە الاتىن، مونيتورينگ جاسايتىن، باسقاراتىن جانە بولەتىن بىرىڭعاي اۆتوماتتاندىرىلعان جۇيە ەنگىزۋ بويىنشا جۇمىس جوسپارىن ازىرلەۋ قاجەت. بۇل باستامانىڭ جۇزەگە اسىرىلۋى ايماقتاعى سۋدى پايدالانۋدىڭ اشىقتىعىن قامتاماسىز ەتىپ، ورتالىق ازيا ەلدەرىمەن اراداعى ديالوگتى جانە دوستىقتى نىعايتۋعا ىقپال ەتەدى»،—دەدى ول.
توقاەۆ ارالدى قۇتقارۋ قورىنىڭ كەلەسى كەزدەسۋىن 2026 جىلى قازاقستاندا وتكىزۋدى ۇسىندى.
«جوعارى دەڭگەيدەگى كەلەسى كەزدەسۋدى ءوزىم باستاماشى بولعان بۇۇ اياسىنداعى ايماقتىق كليماتتىق سامميتپەن بىرىكتىرە وتىرىپ، 2026 جىلى قازاقستاندا وتكىزۋدى ۇسىنامىن»،—دەپ تۇيىندەدى باسشى.
