ميني-ءمۇفتي
وتكەندە ءبىر استا بولدىق، ەل-جۇرت مارقۇم جايلى ازداعان ەستەلىك ايتقان سوڭ يمامعا ءسوز ءتيدى. اگرەسسيا ۇرىپ تۇر، ءاي دەيدى اكەسىندەي قارتتارعا، ءاي، سەندەر مەشىتكە نەگە ءجيى كەلمەيسىڭدەر، نەگە ساداقا بەرمەيسىڭدەر! ولگەندە جيعان-تەرگەنىڭ تۇككە جارامايدى، جالاڭاش كەتەسىڭ!
سوندا دەيمىن يمام جالاڭاش كەتپەي مە، مەشىتكە ساداقا جيناۋدىڭ كەرەگى نە، جالاڭاش كەتەتىن بولساق ءبارىمىز قازىردەن جالاڭاش جۇرە بەرەيىك؟! موللەكەڭدەر باستاسىن. حالىقتان العان ءار تيىندى اللانىڭ كانتسەليارياسىنا تىكە جەتكىزىپ، جاراتۋشىنىڭ سوعان وتەگەن مەيىر-شاپاعاتىن قولىنان الىپ، كەرى اكەلىپ، توبەڭنەن قۇيارداي ەكىلەنەتىندەردى تۇسىنبەيمىن. ءبىراز ۇرسىپ العان موللەكەڭ وزدىگىنەن ارۋاق تاقىرىبىنا اۋىپ كەتتى. ءاي، قاراڭعى كورگە كىرەردە وزىنە كومەكتەسە الماعان ادام سەندەرگە قالاي كومەكتەسەدى، ودان نەگە سۇرايسىڭدار، ارۋاق دەپ كۇناعا باتپاڭدار! - دەدى.
مم. مولدەكەڭنىڭ ءوزى ميني-ءمۇفتي مەستنوگو زناچەنيا! مۇسىلماندار رۋحانياتىنا جاۋاپتى جاننىڭ ءتان مەن جاننىڭ ايىرماسىن ۇقپاي تۇرعانىندا شارۋاسى جوق، كور مەن مارقۇمدى، تىڭداۋشىنى ءبىراز مىجىدى. وعان ناۋرىزباي قاجى تاعانۇلىنىڭ «قازاقى دۇنيەتانىمدا ارۋاقتى قۇرمەتتەۋ، مارقۇمداردىڭ ارۋاعىنا قۇران-دۇعا باعىشتاۋ، ارۋاق قولداسىن، جەلەپ-جەبەپ ءجۇرسىن دەگەننىڭ بارلىعى شاريعاتىمىزدا رۇقسات ەتىلگەن، شاريعاتىمىز تىيىم سالعان دۇنيەلەر ەمەس. مۇنى جاقسى ءتۇسىنۋىمىز كەرەك»، – دەگەنى تۇك ەمەس.
مىنا ءمۇفتي مىقتى ما، ميني-ءمۇفتي مىقتى ما؟
شاعىن اۋىلدارداعى مۇرتسىز مولدەكەڭدەرگە يە بولا الماعان ءمۇفتياتتىڭ اقشالى اعىمداردىڭ ماگنات-ۋاعىزشىلارىنا ءسوزى دە، سەسى دە وتەدى دەگەنگە كۇمان بار. سودان بارىپ قىز-كەلىننىڭ شاشىن بىلاي قويعاندا قۇلپىتاستى ءسوز ەتىپ، اتاڭنىڭ باسىمەن الىساتىندار كوبەيىپ بارادى. قۇراننىڭ اۋەن ەكەنىن ۇقپاي انمەن، دومبىرامەن الىسادى. ولارعا سالساڭ مۋزىكالىق تراكتاتتار جازىپ، اسپاپ زەرتتەگەن ءال-فارابي ناعىز كاززاپتىڭ ءوزى. ونىڭ مۇراسىن جالعاپ جۇرگەن نۇرجان، رامازان، ەرلان، ەركىندەردى ەل الدىندا جازالاۋ كەرەك. قازاق جىرلاماسىن، بيلەمەسىن، كۇلمەسىن، ىشپەسىن-جەمەسىن، مىنبەسىن…
نەگىزى ءدىن وتە نازىك تاقىرىپ، تەك بولمىسقا شابۋىل ۇدەپ بارادى. باقىلاۋدان شىعىپ كەتكەن سەكىلدى، باستىرمالاۋ ۇدەپ بارادى. ءمۇفتيات بىردە كوپتىڭ، بىردە توپتىڭ ءسوزىن سويلەپ، سانسىراپ ءجۇر.
ۇقساس جاڭالىقتار
