مەملەكەت باسشىسى قحر مادەنيەت جانە تۋريزم ءمينيسترى سۋن ەليمەن بىرگە مادەنيەت ورتالىعىن ارالاپ كوردى.
قاسىم-جومارت توقاەۆقا كىتاپحانا، قازاق ءتىلى، مۋزىكا جانە شىعارماشىلىق كابينەتتەرى تانىستىرىلدى. كورمە زالىنا قازاقستاننىڭ ەجەلگى ساق داۋىرىنەن باستاپ XX عاسىردىڭ باس كەزىنە دەيىنگى تاريحىنان سىر شەرتەتىن ەكسپوناتتار مەن ارتەفاكتىلەر قويىلعان.
ەكسپوزيتسيا ارحەولوگياعا، زەرگەرلىك بۇيىمدارعا، قارۋ-جاراق جاساۋ ونەرىنە، ۇلت اسپاپتارىنا جانە ەتنوگرافياعا ارنالعان بەس بولىمنەن تۇرادى. ورتالىقتىڭ كىتاپحانا قورىندا قازاق، قىتاي، اعىلشىن جانە ورىس تىلدەرىندەگى مىڭعا جۋىق كىتاپ بار.
سونداي-اق، پرەزيدەنت قىتاي وقۋشىلارىنىڭ دومبىرامەن ورىنداعان قازاق، قىتاي اۋەندەرىن تىڭدادى.
سونىمەن قاتار مارتەبەلى مەيماندار بەيجىڭ بالالارىنا ارنالعان كيىز باسۋدان شەبەرلىك ساباعىن تاماشالادى.
