پرەزيدەنت اكىمشىلىگى توراعاسىنىڭ ءبىرىنشى ورىنباسارى ەرلان قارين الەۋمەتتىك جەلىدەگى پاراقشاسىندا تويدا تىلەك ايتۋ كەزىندە ەرسى ۋاعىز ايتىپ، قوعامدا قىزۋ تالقىعا تۇسكەن ازاماتتىڭ ارەكەتىنە قاتىستى پىكىر ءبىلدىردى, دەپ حابارلايدى "ادىرنا".
ول اتالعان ۆيدەونى كورگەنىن ايتىپ، وندا ايتىلعان ايەلدەردى كەمسىتەتىن كوزقاراستار مەن انشىلەرگە، مۋزىكا ونەرىنە قارسى پىكىرلەردىڭ قازاق قوعامىنىڭ بولمىسىنا مۇلدە جات ەكەنىن اتاپ ءوتتى.
ەرلان قاريننىڭ ايتۋىنشا، قوعامدىق ومىردە ءدىني شەكتەۋلەردەن بۇرىن زاڭ تالاپتارى باسشىلىققا الىنۋى ءتيىس.
«قازاقستان – زايىرلى مەملەكەت. ءبىزدىڭ تەمىرقازىعىمىز – كونستيتۋتسيا. ءبىرىنشى ورىندا ءدىني شەكتەۋلەر ەمەس، ەلىمىزدىڭ زاڭدارى تۇرادى»، – دەپ جازدى ول.
ەرلان قارين ونەر مەن مادەنيەتتى دىنگە قارسى قويۋدى اسىرا سىلتەۋ دەپ باعالاپ، ەلىمىزدىڭ دامۋ باعىتى بىلىمگە، عىلىمعا، ونەر مەن مادەنيەتكە نەگىزدەلگەنىن اتاپ ءوتتى.
«ونەر مەن مادەنيەتتى دىنگە قارسى قويۋ دا – اسىرا سىلتەۋشىلىك. مەملەكەتىمىز تاڭداعان جول بۇل ەمەس. كەرىسىنشە، ەلىمىز ءبىلىم مەن عىلىمعا، ونەر مەن مادەنيەتكە باسىمدىق بەرىپ كەلەدى.
كوپشىلىك الدىندا ادامداردى بۇلايشا الالاۋ، ءوز پىكىرىن قاساقانا تىقپالاۋ ادەپتىلىككە جاتپايدى. ءبىز ءوزارا قۇرمەت پەن مادەنيەتتى بيىك قويامىز. ەلىمىزدىڭ جاڭا قوعامدىق ەتيكانى قالىپتاستىرۋعا ەرەكشە ءمان بەرىپ وتىرعانى دا سوندىقتان.
سول سەبەپتى، ۇلتتىق بولمىس پەن ەلدىك ۇستانىمدارعا قايشى كەلەتىن مۇنداي ارەكەتتەرگە قوعام بولىپ توسقاۋىل قويۋىمىز قاجەت»، - دەدى ول.
