ەرلان تولەۋتاي: ۇزاققا سوزىلعان ءتان ازىعىنىڭ جەتىسپەۋشىلىگى حالىقتى جۇت جىلعى مال سياقتى – ىندىنسىز، اشكوز قىپ جىبەرگەن.

قازاق – جاپپاي ۆيتامين جەتىسپەۋشىلىگىنە ۇشىراعان ۇلت. ۆيتاميندەر مەن اعزاعا قاجەتتى باسقا دا ميكروەلەمەنتتەردىڭ جەتىسپەۋشىلىگى ۇياتسىزدىقتى تۋدىرادى.

قۇرامى ءتۇرلى دارۋمەندەرگە باي ءنارلى اس ىشپەيتىن حالىقتا ۇيات بولمايدى. ءبىر سوزبەن ايتقاندا، كەدەي حالىقتا ۇجدان بولمايدى. كورىپ وتىرمىز – ۇزاققا سوزىلعان ءتان ازىعىنىڭ جەتىسپەۋشىلىگى حالىقتى جۇت جىلعى مال سياقتى – ىندىنسىز، اشكوز قىپ جىبەرگەن.

ال جان ازىعى – ۇلتتىق رۋحاني قورەكتىڭ جەتىسپەۋشىلىگى – حالىقتىڭ ازعىندالۋى مەن ارسىزدانۋىنا اكەلىپ سوعادى. مۇنداي جاعدايدا يدەولوگيالىق حاوس ورنايدى. وسىناۋ يدەولوگيالىق داعدارىستى رەتتەۋ ءۇشىن مەملەكەت رۋحاني ۆاكۋمدى شەتەلدىك ەكسپانسيالىق قوقىستارمەن تولتىرۋعا تىراسىپ كەلەدى. الايدا تەككە ارام تەر بولۋدا. سەبەبى ەشقانداي رۋحاني يمپورت ء(دىن، مۋزىكا، تەلەۆيدەنيە مەن ساحنالاردى جاۋلاپ العان شەتەلدىك توك شوۋلاردىڭ كوشىرمەلەرى ت.ب.) ۇلتتىق رۋحاني قورەكتىڭ ورنىن تولتىرا المايدى. مۇنى بيلىكتەگى يدەولوگيا مايدانىنا جاۋاپتى شەنەۋنىكتەر بىلمەيدى. بىلەتىندەرى – دارمەنسىز. سەبەبى نازارباەۆ رەجيمى ۇلتقا بولسىن دەگەن ۇستانىممەن ەلگە قىزمەت ەتەتىن، ەتكىسى كەلەتىن تۇلعالاردى (كادرلاردى) جويىپ جىبەردى. بىرەن-ساران بيلىكتە قالعاندارى بويىن جاسىرىپ وتىر. ويتكەنى ابىروي تاپپايتىنىن، بۇل ءۇشىن ءتىپتى جازالاناتىنىن بىلەدى.

حالىقتىڭ ازىپ-توزىپ بارا جاتقاندىعىنىڭ نەگىزگى ەكى فاكتورى وسى. مۇنىڭ سالدارىن كورۋدەي كورىپ كەلە جاتسىزدار. كەشە تاعى كۋا بولدىڭىزدار.

وسىدان كەيىن "سانانى تۇرمىس بيلەيدى" – دەگەن ك.ماركستى اۋليە دەمەي كور.

بيلىك حالىقتى باقىتتى ەتۋ ءۇشىن وسى ەكى ازىققا – جان ازىعى مەن ءتان ازىعىنا قاتار "تويدىرۋى" كەرەك. سوندا 'قوي ۇستىندە بوزتورعاي جۇمىرتقالاعان زامان ورناماق". قارنى توق، بىراق جانى اش حالىق تا قاۋىپتى. سوندىقتان بيلىك – حالىقتى باقىتتى ءھام باقۋاتتى ەتۋ ءۇشىن ونىڭ جانى مەن تانىنە قاجەت وسى ەكى ازىقپەن تولىق قامتاماسىز ەتۋى كەرەك. بىراق حالىقتى باقىتتى ەتەم دەۋشى بيلىكتى ازىرگە كورىپ تۇرعان جوقپىن...