مەملەكەت باسشىسى قاسىم-جومارت توقاەۆ قىرعىزستان، تاجىكستان، تۇرىكمەنستان جانە وزبەكستان پرەزيدەنتتەرىمەن بىرگە "ەكسپو ورتالىق ازيا – 2023" كورمەسىن ارالادى، دەپ حابارلايدى "ادىرنا" ءتىلشىسى اقورداعا سىلتەپ.
دۋشانبەدە ءوتىپ جاتقان "ەكسپو ورتالىق ازيا – 2023" كورمەسىندە قازاقستان الاڭى بار. ول جەردە مەتاللۋرگيا، حيميا، جەڭىل ونەركاسىپ جانە فارماتسەۆتيكا، قۇرىلىس يندۋسترياسى، اۆتوكولىك قۇراستىرۋ، اۋىل شارۋاشىلىعى ماشينالارىن جاساۋ جانە باسقا دا سالالار بويىنشا 130-دان استام كاسىپورىننىڭ ونىمدەرى قويىلعان. قازاقستان ەكسپوزيتسياسىمەن تانىسۋشىلار تىڭايتقىش، اليۋميني جانە زەرگەرلىك بۇيىمدار، مەديتسينالىق جابدىقتار، كوسموس اپپاراتىنىڭ ماكەتتەرى، كومپيۋتەرلەر، تەلەكوممۋنيكاتسيالىق قوندىرعىلار، ۇشقىشسىز باسقارىلاتىن ۇشۋ اپپاراتتارى، قۇرىلىس ماتەريالدارى، كيىم-كەشەك، ءدارى-دارمەكتەر، مەديتسينالىق بۇيىمدار جانە باسقا دا كوپتەگەن وتاندىق ءونىم تۇرلەرىن تاماشالاي الادى.
كورمە قوناقتارىنىڭ نازارىن اۋدارتقان وتاندىق BARK Technology كومپانياسى ازىرلەگەن جيىلىگى 20-320 گتس ۆيبرواكۋستيكالىق تولقىن ارقىلى وكپەنى ەمدەۋگە ارنالعان VibroLUNG بىرەگەي قازاقستاندىق مەديتسينالىق اپپاراتى بولدى. بۇگىندە بۇل قۇرىلعىنى قازاقستاننىڭ، رەسەيدىڭ، وزبەكستاننىڭ، بەلارۋستىڭ، پانامانىڭ، بىرىككەن اراب امىرلىكتەرىنىڭ جانە سينگاپۋردىڭ جەتەكشى كلينيكالارى ساتىپ العان.
كورمەگە وتاندىق ءونىم وندىرۋشىلەر شىعارعان 40-تان استام كولىك، ونىڭ ىشىندە 20 جەڭىل اۆتوكولىك، 10 اۋىل شارۋاشىلىعى تەحنيكاسى، 7 ارناۋلى تەحنيكا، 2 اۆتوبۋس جانە بروندى اسكەري ماشينالار قويىلدى.
قر پرەزيدەنتى قاسىم-جومارت توقاەۆ ۇلتتىق پاۆيلون ەكسپوزيتسيالارىمەن تانىسۋ بارىسىندا تاجىكستان پرەزيدەنتى ەمومالي راحمونعا قازاقستاننىڭ اتىنان وتاندىق QazTechna كومپانياسى قۇراستىرعان مەكتەپ وقۋشىلارىنا ارنالعان اۆتوبۋس جانە VibroLUNG مەديتسينالىق جابدىعىنىڭ 3 جيىنتىعىن دا سىيعا تارتتى.
مەملەكەت باسشىسى قاسىم-جومارت توقاەۆ پرەزيدەنت ەمومالي راحموننىڭ شاقىرۋىمەن تاجىكستان رەسپۋبليكاسىنا جۇمىس ساپارىمەن بارعان بولاتىن. پرەزيدەنتتىڭ ءباسپاسوز قىزمەتىنىڭ حابارلاۋىنشا، ساپار اياسىندا قازاقستان پرەزيدەنتى ورتالىق ازيا مەملەكەتتەرى باسشىلارىنىڭ V كونسۋلتاتيۆتىك كەزدەسۋىنە جانە حالىقارالىق ارالدى قۇتقارۋ قورىنىڭ قۇرىلتايشى مەملەكەتتەر باسشىلارى كەڭەسىنىڭ وتىرىسىنا قاتىسادى دەپ جوسپارلانىپ وتىر.
ۇقساس جاڭالىقتار
