تالانتتى جازۋشى ءشاربانۋ بەيسەنوۆا بيىلعى مەملەكەتتىك سىيلىق تىزىمىنەن ءوز اتى-ءجونىن الدىرىپ تاستاپتى. اپايىمدى ەرەكشە قۇرمەتتەيمىن، سىيلايمىن. بىراق بۇل ارەكەتىن قولدامايمىن. الەۋمەتتىك جەلىدە ايتىلعان اڭگىمەلەرگە سەنسەك «بيلىكتە جۇرگەن بالاسىنا ءسوز كەلمەۋى ءۇشىن» ول وسىنداي قادامعا بارىپتى. اقىلعا قونبايتىن، قيسىنسىز قادام.
ۇلىنىڭ بۇل ماسەلەگە نە قاتىسى بار؟ تۇك تۇسىنبەدىم. ماۋلەن مەمقىزمەتكە كەلمەي تۇرعاندا ءشاربانۋ بەيسەنوۆانىڭ تالانتى مويىندالىپ، اپامىز ەلگە جازۋشى بولىپ تانىلعان. «تويعا كەلگەن كەلىنشەك»، «زاعيپا»، «تەمىرقازىق» سياقتى بىرىنەن-ءبىرى وتەتىن عاجايىپ تۋىندىلارى تاۋەلسىزدىككە دەيىن جازىلىپ، سىنشىلاردىڭ جوعارى باعاسىن العان.
اپامىز اۋدارما سالاسىندا زور ەڭبەك ءسىڭىرىپ، ۋكراين جازۋشىسى ۆلاديمر دروزدتىڭ، ازەربايجان جازۋشىسى اناردىڭ، حانس كريستيان اندەرسەننىڭ ەرتەگىلەرىن، لاتىنامەريكالىق قالامگەر جورجي امادۋدىڭ «قۇم جاعالاۋدىڭ كاپيتاندارى» رومانىن انا تىلىمىزگە اۋدارىپ، وقىرماننىڭ وي-ورەسىن بايىتتى. بۇلاردىڭ ءبارى ءشاربانۋ بەيسەنوۆانىڭ عانا ەمەس، قازاق ادەبيەتىنىڭ دە زور تابىسى عوي. ەندەشە نەگە مۇنداي ەڭبەك بالاسىنىڭ مەمقىزمەتتكە جۇرگەنىنە بولا باعالانباي، ەلەۋسىز-ەسكەرۋسىز قالۋى ءتيىس.
ادەبيەتكە ەڭبەگى سىڭگەن تالانتتار باس تارتىپ، بۇل ماراپاتتى كىم-كورىنگەن الا بەرسە، ونسىز دا بەدەلى جوعالىپ بارا جاتقان مەمسىيلىقتا نە قادىر-قاسيەت قالادى؟
