ايگىلى اكتەر، كينورەجيسسەر دجەكي چان قىتايدىڭ «ناعىز قاھارماندار» اتتى ءانىن شىڭجاڭنىڭ كورىكتى جايلاۋىندا دومبىرانىڭ سۇيەمەلدەۋىمەن ايتىپ بەردى، دەپ حابارلايدى “ادىرنا” ۇلتتىق پورتالى.
بۇل ءاندى ءارتۇرلى كونتسەرتتەردە تىڭداپ جۇرگەن شىعارسىزدار. بىراق دومبىرانىڭ سۇيەمەلدەۋىمەن ەشكىم ەستىمەگەن بولۋى كەرەك. بۇگىن مەن سىزدەرگە «ناعىز قاھارمانداردى» دومبىرامەن ايتىپ بەرەيىن، — دەيدى دجەكي چان.
جاقىندا عانا دجەكي چان شىڭجاڭنىڭ قىتاي مەملەكەتى «تۇلپار مەكەنى» دەپ تانىعان ىلە قازاق اۆتونوميالى وبلىسىنىڭ موڭعولكۇرە اۋدانىندا «تۇلپار» حالىقارالىق تۋريزم مەرەكەسىنە كەلىپ، سوندا ونەر كورسەتكەن بولاتىن. قىتايلىق اكتەردىڭ دومبىرامەن ايتقان بۇل ءانى وسى تۋريستىك فەستيۆالعا كەلگەن كەزدە ورىندالعان بولۋى مۇمكىن.
16 شىلدەدە شىڭجاڭنىڭ ىلە قازاق اۆتونوميالى وبلىسى موڭعولكۇرە اۋدانىنىڭ «تۇلپارلار مەكەنى» مادەني تۋريستىك ساياباعىندا اشىلعان فەستيۆالدە دجەكي چان 56 ەتنوس وكىلدەرىمەن بىرگە «ۇلت» ءانىن ورىنداسا، كورەرمەندەرمەن بىرگە «تۋعان جەردى جىرلايمىز» ءانىن شىرقاعان.
