بۇگىن ورتالىق كوممۋنيكاتسيالار قىزمەتىندە استانا قالاسى اكىمى جەڭىس قاسىمبەكتىڭ قاتىسۋىمەن ءباسپاسوز كونفەرەنتسياسى ءوتتى. اكىمگە استاناعا كوشىپ كەلۋشى حالىقتىڭ قاراسى جانە تالدىكول ماسەلەسىن سۇراق رەتىندە قويدىق. باس شاھاردىڭ باسشىسى سۇراققا بايىپتى جاۋاپ بەردى.
جەڭىس ماحمۇتۇلى حالىققا ەسەپ بەرگەن كەزدەسۋدە بەلگىلى اقىن نەسىپبەك ايتۇلى «استانا سوزىلا بەرەتىن رەزەڭكە ەمەس قوي ەندى. سوندىقتان، بولاشاقتا استاناعا كەلۋشىلەردى شەكتەۋ كەرەك» دەگەن بولاتىن. استانا اكىمى اقىننىڭ پىكىرىنە قالاي قارايدى؟
«ءبىز ۋنيتارلى مەملەكەتپىز. قازاقستاننىڭ حالقى ەلورداعا كوشىپ كەلسە، وعان ەشقانداي شەكتەۋ جوق. بولمايدى دا. ەكىنشى ءبىر ماسەلە بار. سونشاما ادام كوشىپ كەلىپ جاتىر. ول ازاماتتاردى قابىلداۋ ءۇشىن استانا ساپالى ينجەنەرلىك جانە الەۋمەتتىك ينفراقۇرىلىمدى دايىنداۋ كەرەك. دۇرىس قوي. حالىق كەلىپ جاتىر، مەكتەپ جانە باسقا دا الەۋمەتتىك نىساندار جەتىسپەي جاتىر. جىلۋ مەن سۋ ماسەلەسى تولىعىمەن شەشىلگەن جوق. وسىنداي ماسەلەنى تەزدەتىپ شەشۋ قاجەت. جالپى ۋربانيزاتسيا – الەمدەگى ترەند. استاناعا دا، الماتىعا دا، شىمكەنتكە دە جانە باسقا دا ءىرى قالالارعا حالىق كوشىپ كەلە بەرەدى. ءبىزدىڭ جوسپارىمىز بويىنشا، 2030 جىلعا دەيىن قالا حالقىنىڭ سانى 2 ملن جەتەدى. سوندىقتان ءبىز سوعان دايىندالىپ جاتىرمىز»، – دەدى ول.
استانانىڭ ەڭ باستى ماسەلەرىنىڭ ءبىرى تالدىكولدىڭ جىرى دەسەك قاتەلەسپەگەن بولار ەدىك. تالدىكولدى ساقتاپ قالا الامىز با جانە سول جەرگە ۇلكەن ساياباق سالىنا ما؟ تالدىكولدە ۇلكەن ساياباق سالۋ ماسەلەسى نازاردان تىس قالىپ قالعان جوق پا؟ ءجۋرناليستىڭ بۇل ساۋالىن اكىم «وتە ورىندى سۇراق» دەپ ايتتى.
«بۇل ماسەلە كۇندە كوتەرىلەدى. بەلسەندى ازاماتتار مەن ەكولوگتارمەن وسى ماسەلەنى اقىلداسىپ جۇرەمىز. قازىر كەلەسى شەشىمگە كەلىپ وتىرمىز. ۇلكەن تالدىكولدە 1990 جىلدارى 50 ملن كۋب سۋ بولاتىن. 2000 جىلدارى 10 ملن كۋب سۋ بولسا، قازىر ونىڭ مولشەرى 1 ملن كۋبتان از. 2015 جىلدان باستاپ كارىز ارىلى تالدىكولگە باراتىن سۋدى تازالاپ ەسىل وزەنىنە جىبەرگەنبىز. ەندى مينيسترلىكپەن كەلىسىپ ول سۋدى ۇلكەن تالدىكولگە بەرەتىن بولدىق. ەكى اپتا بولدى ول سۋدى سوندا جىبەرىپ جاتىرمىز. ۇلكەن تالدىكولدىڭ كولەمىن بەس ەسە كوبەيتەمىز. وعان 1,5-2 جىل كەرەك بولادى. كەلەسى جىلدىڭ سوڭىنا دەيىن ونى قالپىنا كەلتىرەمىز دەپ جوسپارلاپ وتىرمىز. كىشى تالدىكولدە بىرنەشە كىشى كولدەر بولاتىن. ءبىزدىڭ جوسپارىمىز بويىنشا، 3, 7 جانە 9 ۋچاستوك بويىنشا جۇمىستار اتقارامىز جانە ول ساقتالىپ قالاتىن بولادى. ال ءسىز ايتقان ساياباق بۇرىنعى 5 ۋچاستوكتا بولۋى كەرەك ەدى، بىراق ونىڭ جوباسى قازىر دايىن ەمەس. دايىندالىپ جاتىر. بىراق ونى قالانىڭ تۇرعىندارىمەن اقىلداسۋ كەرەك. ول جەردە تال وسە مە، وسپەي مە دەگەن ماسەلە بار. سوندىقتان ەكولوگتارمەن وسى ماسەلە بويىنشا كەلىسسوز وتكىزىپ جاتىرمىز. بىراق ول جەردە جاڭا قۇرىلىس بولمايدى. سالىنعان ۇيدە ادامدار تۇرادى، ولارعا ەشتەڭە ىستەي المايمىز»، – دەدى اكىم.
استانانىڭ بۇرىنعى اكىمى التاي كولگىنوۆ تالدىكول سۋىن قۇرعاتىپ، ءۇي سالۋعا رۇقسات بەرىپ ەدى. كولگىنوۆ قۇرعاتقان كولدى قازىرگى اكىم ايدىنعا اينالدىرسام دەيدى. الايدا قالادا سۋ ماسەلەسى جالعىز تالدىكولمەن شەكتەلىپ قالمايتىنىن تۇسىنگەن شەنەۋنىك كەشەندى شارالارعا دا مۇرىندىق بولار ەدى.
سەرىك جولداسبەكوۆ
«ادىرنا» ۇلتتىق پورتالى
