اتىراۋ وبلىسىندا مەملەكەتتىك مەكەمەنىڭ قارجىلاندىرۋىمەن "Aزان" اتتى ءدىني ينتەرنەت-راديو ىسكە قوسىلماق، - دەپ حابارلايدى ادىرنا ۇلتتىق پورتالى.
قازاقستان - زايىرلى مەملەكەت. كونستيتۋتسيادا مەملەكەتىمىزدىڭ ەشقانداي دىنگە باسىمدىق بەرمەيتىنى تايعا تاڭبا باسقانداي جازىلعان. سوعان قاراماستان، اتىراۋ وبلىسى ءدىن ىستەرى باسقارماسى «ازان» اتتى ءدىني باعىتتاعى راديو اشقالى جاتقانى قالاي؟ مەملەكەتتىڭ بيۋدجەتىنەن قارجىلاندىرىلعالى وتىرعان بۇل راديو قانداي ءدىندى ناسيحاتتاماق؟
وبلىستىق ءدىن باسقارماسى تاراتقان اقپاراتتا: "اتىراۋ وبلىستىق ءدىن ىستەرى باسقارماسىنىڭ "قازىر قوعامدا جات ءدىني اعىم يدەولوگياسىنا يممۋنيتەت قالىپتاستىرۋ ماقساتىندا الەۋمەتتىك جەلىلەر، گازەت-جۋرنالدار جانە تەلەەكرانداردا اقپارات كوپتەپ تاراتىلۋدا. الايدا اقپارات تاراتۋدىڭ بۇگىن دە باستاپقى ءۇش ءتۇرى ەسكەرىلىپ جۇرسە دە، ءتورتىنشى ءتۇرىن، ياعني راديو ارقىلى اقپارات تاراتۋ ماسەلەلەرى ەلىمىزدە قاراستىرىلماعان. سوعان بايلانىستى وڭىردە العاش رەت «ازان» راديوسى ءوز جۇمىسىن باستاماق. «ازان» راديوسى — ءدىن مەن ءداستۇر، ۋاقىت پەن زامان تالابىنىڭ توعىسقان ورتاسى. ۇلتىمىزدىڭ وتكەنى مەن بولاشاعىنا ءۇن تاستاۋشى، وسكەلەڭ ۇرپاق پەن اعا بۋىندى بايلانىستىراتىن التىن كوپىر، اقپاراتتى-ساراپتامالىق الاڭ" دەلىنگەن.
اكىمدىك قۇرامىنداعى ءدىني باسقارما جات ءدىني اعىممەن كۇرەسىپ، زارارلى ءدىني توپتاردى زاڭ اياسىندا اۋىزدىقتاۋعا مىندەتتى. وعان ەشكىمنىڭ قارسىلىعى جوق. بىراق، جات ءدىني اعىم يدەولوگياسىنا قارسى يممۋنيتەت قالىپتاستىرۋ ءۇشىن بۇقارالىق اقپارات قۇرالىن اشىپ، ءدىن مەن ءداستۇردى ساباقتاستىرا ناسيحاتتاۋ باسقارمانىڭ قۇزىرەتىنە كىرە مە؟ زايىرلى مەملەكەتتىڭ زاڭى بۇعان رۇقسات ەتە ما؟ اتىراۋ وبلىسى اكىمدىگىنە قاراستى ءدىني باسقارمانىڭ ءمۇفتياتتىڭ مىندەتىن اتقارۋعا تالپىنۋىنىڭ استارىندا نە جاتىر؟
اتىراۋ وبلىسى ءدىن ىستەرى باسقارماسى باسشىسىنىڭ مىندەتىن اتقارۋشى مۇحتار ىزعاليەۆ راديو جايلى: "مۇندا قازىرگى تىڭدارماننىڭ كوكەيىندە جۇرگەن سۇراققا جاۋاپ، تاڭداۋ الدىندا تۇرعان جاس بۋىنعا جول كورسەتۋ، بيلىك پەن قوعامنىڭ ءبىر ارنادا تەڭ ديالوگ قۇرۋىنا مۇرىندىق بولاتىن پىكىرتالاس ورتاسى بار. "ازان" راديوسى — زەردەلى اقپاراتتى تاراتۋعا، ۇيرەتۋگە جانە جول سىلتەۋگە باعىتتايتىن نۇسقاۋشى بولۋدى كوزدەيدى" دەپتى.
مۇحتار ىزعاليەۆ ءوزى باسقارىپ وتىرعان مەملەكەتتىك مەكەمەنىڭ نەگىزگى مىندەتىنە نە كىرىپ، نە كىرمەيتىنىن بىلمەيتىن سياقتى. ءدىن ىستەرى باسقارماسى دەگەن قازاقستان ازاماتتارىنىڭ قانداي ءدىندى ۇستانىپ، قانداي جولمەن ءجۇرۋىن كورسەتەتىن، ءدىن ۇيرەتەتىن مەشىت-مەدرەسە ەمەس. ول - مەملەكەتتىك مەكەمە. ءدىن ىستەرى باسقارماسى، بارلىق دىنگە بىردەي كوزقاراستا قاراپ، دىنىشىلىك ءھام دىنارالىق احۋالداردى جۇيەلەپ وتىرۋعا ءتيىستى. ونىڭ بۇدان باسقا مىندەتى جوق. ءداستۇر-سالتتى، ءدىندى، قۇدايدى ناسيحاتتاۋ باسقارمانىڭ قۇزىرەتىنە كىرمەيدى.
"ازان" دەگەن ءدىني راسىمگە، اتاپ ايتقاندا مۇسىلماندىققا عانا قاتىستى ءسوز. مۇسىلماندار نامازعا جاماعاتتى شاقىرۋ ءۇشىن ازان ايتادى. دەمەك وسى ءبىر راديوعا اتاۋ بولعان ءدىني سوزدەن-اق وبلىستىق ءدىن ىستەرى باسقارماسىنىڭ مەملەكەتتىك زايىرلىلىق ۇستانىمىن اياق استى ەتىپ، مەملەكەتىمىزدەگى باسقا دا دىندەردىڭ قۇقىعىن تاپتاپ، تەك يسلامي باعىتتاعى راديو اشۋدى كوزدەپ وتىرعانىن بايقاۋعا بولادى.
اقان ءادىل
ادىرنا ۇلتتىق پورتالى
