مەملەكەت باسشىسى قاسىم-جومارت توقاەۆ ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانى قابىلدادى، دەپ حابارلايدى «ادىرنا» ءتىلشىسى.
پرەزيدەنتكە ەڭبەك جانە الەۋمەتتىك قورعاۋ سالاسىنداعى مەملەكەتتىك ساياساتتىڭ باستى باعىتتارىن جۇزەگە اسىرۋ بارىسى جونىندە باياندالدى.
سۆەتلانا جاقىپوۆا حالىقتى جۇمىسپەن قامتۋ شارالارى تۋرالى ايتتى. بۇگىنگى تاڭدا ازاماتتاردى جۇمىسپەن قامتۋ بويىنشا 2029 جىلعا دەيىنگى جوسپاردىڭ 83 پايىزى ورىندالعان. سوڭعى بەس جىلدا 2,7 ميلليون ادام ەڭبەككە تارتىلدى. ساپالى جۇمىس ورىندارىن كوپتەپ اشۋ ءۇشىن وڭىرلىك جول كارتاسى مەن جىل سايىنعى KPI ىسكە اسىرىلۋدا.
مەملەكەت باسشىسىنا بيىلعى 10 ايدا اتاۋلى الەۋمەتتىك كومەك الۋشىلاردىڭ سانى 30 پايىزعا ازايعانى جايىندا اقپارات بەرىلدى. ناتيجەسىندە رەسۋرستاردى شىن مانىندە مۇقتاج جاندارعا قايتا ءبولۋ مۇمكىندىگى پايدا بولعان. قازىرگى كەزدە مۇنداي كومەك ءتۇرىن 285,1 مىڭ ادام الدى. بۇل ماقساتقا 27,1 ميلليارد تەڭگە جۇمسالماق.
سونىمەن قاتار مينيستر وندىرىستىك جاراقات الۋ 6,5 پايىزعا، ال كىسى ولىمىنە اكەلىپ سوعاتىن قايعىلى وقيعالار 4,5 پايىزعا ازايعانىن مالىمدەدى. ۇسىنىلعان دەرەككە سايكەس، الەۋمەتتىك قىزمەتتەر پورتالى ارقىلى 522 مىڭنان استام ادامعا قىزمەت كورسەتىلگەن، 27 مىڭ ازامات ينۆاتاكسي كومەگىنە جۇگىنگەن.
بۇدان بولەك، پرەزيدەنتكە بيىل بازالىق زەينەتاقى مولشەرى ەڭ تومەنگى كۇنكورىس دەڭگەيىنىڭ 70 پايىزىنا دەيىن ۇلعايتىلعانى تۋرالى ەسەپ بەرىلدى. جىل سايىن ينفلياتسيا دەڭگەيىنە سايكەس يندەكساتسيالاۋ جۇرگىزىلەدى. جۇمىس بەرۋشى تاراپىنان تولەنەتىن مىندەتتى زەينەتاقى جارناسىنىڭ مولشەرلەمەسى كەزەڭ-كەزەڭىمەن ءوسىپ، 2028 جىلعا قاراي 5 پايىزعا جەتەدى. جۇمىسپەن قامتىلعان حالىقتىڭ 65 پايىزى جيناقتاۋشى زەينەتاقى قورىنىڭ سالىمشىلارى سانالادى.
كەزدەسۋ سوڭىندا مەملەكەت باسشىسى جۇمىسپەن قامتۋ ساپاسىن جاقسارتۋعا، الەۋمەتتىك قولداۋ تەتىكتەرىن ودان ءارى تسيفرلاندىرۋعا، ەڭبەك قاتىناستارىنداعى قاۋىپ-قاتەرلەردىڭ الدىن الۋ شارالارىن كۇشەيتۋگە، زەينەتاقى جۇيەسىن جانە كوشى-قون ساياساتىن جەتىلدىرۋگە باعىتتالعان بىرقاتار تاپسىرما بەردى.
