مينيستر ۇندەۋ جاسادى. تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستاندىقتاردى ءموبيلدى ينتەرنەتتى ۇنەمدەپ پايدالانۋعا شاقىردى. ءموبيلدى ينتەرنەت قولدانۋدىڭ مادەنيەتىن مەڭگەرۋگە ۇندەدى، دەپ حابارلايدى "ادىرنا" ۇلتتىق پورتالى.
مينيستر ۇكىمەت وتىرىسىنان كەيىن تىلشىلەرگە بەرگەن سۇحباتىندا:
«قازاقستاندىقتار (ايىنا – رەد.) 15-20 گبايت اقپارات تۇتىنىپ ۇيرەنىپ قالعانى تۇسىنىكتى. بىراق ۇنەمدەيىكشى، ءموبيلدى ينتەرنەت دەگەن قىمبات ەكەنىن تۇسىنەيىكشى. ۇيگە كەلگەندە Wi-Fi-عا قوسىلۋ كەرەك. قانداي دا ءبىر مادەنيەت بولۋى ءتيىس»، - دەدى.
سونىمەن قاتار ينتەرنەت ساپاسى ناشارلاعان جاعدايدا بايلانىس وپەراتورلارىنىڭ حالىقتى قۇلاقتاندىرۋى ءتيىس ەكەندىگىن ايتتى. ەندى مۇنداي ارەكەتكە بارلىق بايلانىس وپەراتورلارىنىڭ مىندەتتەلەتىنى ايتىلدى.
سونداي-اق مينيستر ەلىمىزدە ەڭ تومەنگى ءموبيلدى ينتەرنەت ءتاريفى 2700 تەڭگە تۇرادى دەگەن مالىمەت كەلتىردى.
ەستەرىڭىزگە سالا كەتەيىك، بۇعان دەيىن ب.مۋسين استانا قالاسى ينتەرنەت جىلدامدىعى بويىنشا توكيونى باسىپ وزعانىن حابارلاعان ەدى.
"ادىرنا" ۇلتتىق پورتالى
