"پوليتسيا قىزمەتكەرى زاڭعا باعىناتىن ادامعا قۇرمەتپەن قاراۋى كەرەك. ال ءتارتىپ بۇزۋشىلارمەن زاڭ اياسىندا سويلەسۋ قاجەت. ادامدى ازاپتاۋعا، قيناۋعا، تىيىم سالىنعان تەرگەۋ تاسىلدەرىن قولدانۋعا مۇلدەم جول بەرىلمەيدى. ءاربىر ءتارتىپ ساقشىسى مۇنى جەتە تۇسىنۋگە ءتيىس", - دەدى پرەزيدەنت.
مەملەكەت باسشىسى كۇندەلىكتى جۇمىس بارىسىندا پوليتسيا قىزمەتكەرلەرى زاڭعا جۇگىنىپ، تالاپتاردى ساقتالسا، ازاماتتاردىڭ پوليتسياعا دەگەن سەنىمى ارتااتىندىعىن دا ايتتى.
"ارينە، قوعام تاراپىنان دا قۇرمەت بولۋى كەرەك. حالىقتىڭ تۇسىنىگىندە پوليتسيا ازاماتتاردى قورعاۋشى، قولداۋشى، قىلمىستىڭ الدىن الۋشى، زاڭنىڭ ورىندالۋىن قاداعالاۋشى بولۋعا ءتيىس. وكىنىشكە قاراي، قازىر ەل اراسىندا پوليتسيانىڭ كەلبەتى، بەدەلى ءدال سونداي دەپ ايتا المايمىز. ءتارتىپ ساقشىسىنىڭ زاڭدى تالابىنا باعىنباۋ، وعان قوقان-لوقى كورسەتۋ، ءتىپتى، كۇش قولدانۋ دۇرىس ەمەس. وسىنداي ارەكەتتەردى دوعارۋ كەرەك. مۇنداي جاعدايدا بۇزاقىلار جاۋاپسىز قالماۋى قاجەت", - دەدى قاسىم-جومارت توقاەۆ.
ورايى كەلگەندە ايتا كەتەيىك، "قاڭتار وقيعاسى" كەزىندەگى پوليتسيانىڭ ءىس-ارەكەتىنە قاتىستى قوعامدا ءتۇرلى پىكىر مەن كوزقاراستار ءالى كۇنگە دەيىن ايتىلىپ كەلەدى. باسىندا پوليتسيانىڭ قورلىعى وتكەنىنە كوڭىل اۋدارا قويعاندار بولمادى، كەيىن شاعىم ايتۋشىلاردىڭ سانى ارتىپ، بيلىك بۇل دەرەكتەرگە نازار سالعان. باس پروكۋرور بەرىك اسىلوۆ 5 قاڭتاردا پارلامەنتتەگى جيىندا «ازاپتاۋ شاعىمدارى بويىنشا 329 ءىس قوزعالىپ، پروكۋراتۋرادا ۇقك مەن پوليتسيانىڭ 34 قىزمەتكەرىنىڭ ءىسى قارالىپ جاتقانىن ايتقان ەدى.
