قر سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالالىق دەپارتامەنتى مالىمدەمە جاسادى. دەپارتامەنت قالاداعى پوليتسيا باسقارماسىنىڭ ءبولىم باستىعى مەن تەرگەۋشىسىن پارا الدى دەگەن كۇدىكپەن تەرگەۋ ۇستىندە. ولاردىڭ 500 مىڭ تەڭگە كولەمىندە پارا الىپ، بەلگىلى ءبىر توپتىڭ جازادان سىتىلىپ كەتۋىنە جول اشقانى ايتىلدى. قازىر سوتقا دەيىنگى تەرگەۋ امالدارى باستالىپ كەتتى، دەپ حابارلايدى "ادىرنا" ۇلتتىق پورتالى.
قر سىبايلاس جەمقورلىققا قارسى ءىس-قيمىل اگەنتتىگىنىڭ حابارلاۋىنشا، كۇدىكتىلەر الدىن الا ءسوز بايلاسىپ، قالا تۇرعىنىنان 500 مىڭ تەڭگە كولەمىندە پارا الدى دەگەن كۇدىككە ءىلىنىپ وتىر. ولار وسى ارەكەتى ارقىلى قىلمىسقا ىلىنگەنى تۇرعان ادامداردىڭ سىتىلىپ كەتۋىنە جول اشپاق بولعانى ايتىلدى.
قازىرگى ۋاقىتتا كۇدىكتىلەر جاساعان قىلمىسىن مويىندادى.
سوتقا دەيىنگى تەرگەپ-تەكسەرۋ جالعاسىپ جاتىر. قىلمىستىق-پروتسەستىك كودەكستىڭ 201-بابىنا سايكەس وزگە دە اقپارات جاريا ەتۋگە جاتپايدى.
كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.
"ادىرنا" ۇلتتىق پورتالى
