"بەسىك جىرى" قىسقامەتراجدى انيماتسيالىق ءفيلمى يسپانيا استاناسى مادريدتە وتكەن بەدەلدى كينوفەستيۆالدە 1500 ۇمىتكەردىڭ ىشىندە ەڭ ۇزدىگى رەتىندە تانىلدى. بۇل جونىندە "ادىرنا" ۇلتتىق پورتالى قر مادەنيەت جانە سپورت مينيسترلىگىنە سىلتەمە كورسەتە وتىرىپ حابارلايدى.
مادەنيەت جانە سپورت مينيسترلىگىنىڭ قولداۋىمەن جارىققا شىققان "بەسىك جىرى" قىسقامەتراجدى انيماتسيالىق ءفيلمى "ەڭ ۇزدىك قىسقامەتراجدى انيماتسيالىق فيلم" جۇلدەسىن جەڭىپ الدى.
"MADFA Madrid Film Awards – 2023 20-شى حالىقارالىق بايقاۋعا 1500 انيماتسيالىق جۇمىس ۇمىتكەر رەتىندە ۇسىنىلدى", - دەپ مالىمدەدى قر مادەنيەت جانە سپورت مينيسترلىگى.
مادەنيەت جانە سپورت ءمينيسترى اسحات ورالوۆ "قازاقستاندىق انيماتسيالىق ءفيلمنىڭ بەدەلدى حالىقارالىق بايقاۋدىڭ باس جۇلدەسىن يەلەنگەنى – وتاندىق انيماتسيا سالاسىنىڭ وڭ باعىتتا دامىپ كەلە جاتقانىنىڭ كورسەتكىشى دەپ ساناۋعا بولاتىنىن" اتاپ ءوتتى.
مادريد كينوجۇلدەسى MADFA (MFA) IMDb رەسمي كونكۋرسىنا كىرەدى. فەستيۆال جىل سايىن ءوز الاڭىندا الەمنىڭ ەڭ ۇزدىك تۋىندىلارى مەن تالانتتى رەجيسسەرلەردىڭ باسىن قوسادى.
"ادىرنا" ۇلتتىق پورتالى
