قاڭتار وقيعاسى كەزىندە تالدىقورعان حالقىنا قارسى وق اتپاي، بۇيرىقتى ورىنداماعانى ءۇشىن قولىنا كىسەن سالىنىپ، ايىپتى بولعان بۇرىنعى الماتى وبلىسى پوليتسيا دەپارتامەنتىنىڭ باسشىسى سەرىك كۇدەرباەۆ سوتتالعالى جاتىر. قاڭتار وقيعاسى بويىنشا كۇدىكتى دەپ تانىلعان گەنەرال-مايوردىڭ ادۆوكاتتارى سوتتان ءىستى توقتاتۋدى سۇراپ ءوتىنىش جولدادى، دەپ حابارلايدى "ادىرنا" ۇلتتىق پورتالى ەكسپرەسس ك. پورتالىنا سىلتەمە كورسەتە وتىرىپ.
قاڭتار وقيعاسى كەزىندە قىزمەت ورنىن تاستاپ كەتكەن سەرىك كۇدەباەۆتىڭ مالىمدەمەسى الەۋمەتتىك جەلىدە تارادى. كۇدىكتىنىڭ قورعاۋشىلارى سوت وكىلدەرىنەن ءىستى تولىق توقتاتۋدى جانە گەنەرال-مايوردى قىزمەتىنە قايتارۋدى سۇراپ، ءوتىنىش جولداعان. قورعاۋشىلارىنىڭ ايتۋىنشا، كۇدەباەۆ بەيبىت حالىققا وق اتقىسى كەلمەگەندىكتەن وسىنداي قادامعا بارۋعا ءماجبۇر بولعان.
View this post on Instagram
"سەرىك كۇدەباەۆ تالدىقورعانداعى ميتينگ كەزىندە قاتتى جاراقات الدى. ونىڭ باسىنا تاس ءتيىپ، قانسىرادى. بىراق سوعان قاراماستان ول حالىققا وق اتقىسى كەلگەن جوق. سوندىقتان وسىنداي شەشىمگە كەلدى. ەگەر ول اتۋعا بۇيرىق بەرگەندە كەمىندە 300 ادام قازا تابۋىشى ەدى. سىزدەن وسى قىلمىستىق ءىستى توقتاتۋىڭىزدى سۇرايمىز. ويتكەنى كۇدەباەۆ ءوز قىزمەتىن ادال اتقارعان ادام", — دەدى پد بۇرىنعى باسشىسىنىڭ ادۆوكاتتارى.
ايتا كەتەيىك، سەرىك كۇدەباەۆ قك 370 بابى 4-بولىگى 1-تارماعى (اۋىر زارداپتارعا الىپ كەلگەن قىزمەتتەگi ارەكەتسiزدiك) بويىنشا ايىپتى دەپ تانىلىپ وتىر. ول 2020 جىلدان 2022 جىلعا دەيىن الماتى وبلىسى پوليتسيا دەپارتامەنتىنىڭ باستىعى بولىپ جۇمىس ىستەگەن.
"ادىرنا" ۇلتتىق پورتالى
