1. «تاۋەلسىزدىك» جىرى
پاۆلوداردا «تاۋەلسىزدىك» داڭعىلىنىڭ اتاۋى قوعامدىق تىڭداۋعا ۇسىنىلماي-اق «Nursultan Nazarbaev» اتاۋىنا اسىعىس اۋىستىرىلىپ جىبەرىلدى! ەلباسىنىڭ ەسىم-سويىن بەرۋگە استانا، لوموۆ، لەرمونتوۆ، ءى ماي كوشەلەرى دە لايىقتى ەكەنىن وبلىس اكىمى بولات باقاۋوۆ پەن قالا اكىمى ءانۋار كۇمپەكەەۆ ەسكەرگەن جوق.
«تاۋەلسىزدىك»، قاسيەتتى جىرسىڭ سەن،
ارۋاقتى ەردىڭ رۋحى كەشسىن – كۇرسىنسەم!
كوزگە ەلەستەپ مالايسارى سياقتى،
جاسىبايداي تۇسىمە ەنىپ ءجۇرسىڭ سەن!..
قارالى كوش قاراتاۋدان سابىلعان
جەتتى ەرتىسكە سۇڭگىپ ءوتىپ ساعىمنان...
جەتىم ءۇمىت جىلاپ قالدى قۇزارتتا
كەنەسارى حاننىڭ باسى شابىلعان!..
ماگاداننان قايتسا قازدار تىزبەگى،
كەرەكۋدە وكسيدى اسپان كۇزدەگى!..
«بۋتىركادا» قان-جوسا بوپ
تاريحتىڭ
بەتىنە ەندى ايماۋىتوۆ ىزدەرى!..
كەيدە ەرىكسىز ءۇيىرلى يتپەن تالاستىم،
قاسقىرشا ۇلىپ كوكجالمەن دە جاراستىم!
داردا سوڭعى دەمى ۇزىلگەن
ستۋدەنت
رىسقۇلبەكوۆ رۋحى ەدى عوي الاشتىڭ!..
جۇيكەم ءالسىز، بالكىم ەرتەڭ سىر بەرەر،
ءبىز كەتەرمىز – ورنىمىزعا كىم كەلەر؟..
شىندىقتى ىزدەپ جۇرگەن جاننىڭ الدىنان
شىقسا ەگەردە اۆتوزاك پەن تۇرمەلەر!..
تۇرعانىمەن تەمىر ءتارتىپ كۇشىندە،
تورعا تۇسسەڭ ءور ەڭسەڭدى تۇسىرمە!
دەموكراتيا
دارىگەرگە جالتاقتاپ
جۇرگەن جوق قوي جىندىحانا ىشىندە!..
سىندارلى شاق جىبەرمەيدى ەسەسىن،
سۇمدىق ويمەن ءتۇرلى قيال كەشەسىڭ!
تىنىشتىعىن ءتۇننىڭ دار-دار ايىرىپ،
ىزدەپ كەلەم «تاۋەلسىزدىك» كوشەسىن!..
2. اكىمدەر مەن اقىندار
«تاۋەلسىزدىك» جايىنداعى تولعانىس –
ەندى جۇدەۋ كوڭىلىمە الدانىش.
بايىپتاسام، ونەگە ەكەن وزگەگە
ساعىنتاەۆ باقىتجاننان* قالعان ءىس!
اكىمدەردى ءسوز ەتپەيىن دەسەم دە،
تۋدىرادى سەزىمىمدە تاڭدانىس:
ەرلان ارىن* قانىنداعى تەكتىلىك،
بوزىمباەۆ* بويىنداعى ار-نامىس!
ءبىز سولاردىڭ قۇرمەتىنە بولەندىك،
تورگە شىعىپ تورەمەن دە تەڭەلدىك!
باقاۋوۆتىڭ كەڭسەسىنەن، ايتسە دە،
بايقالا ما بيىكتىك پەن تەرەڭدىك؟..
اتقا مىنگەن، تاققا مىنگەن كىسىمەن
سالەمدەسۋ وڭاي ەمەس،
تۇسىنەم...
ەندى، ءسىرا، كەڭدىك ىزدەۋ كۇلكىلى،
كۇمپەكەەۆ كابينەتى ىشىنەن...
ەگىز شىعار بايلىق، مانساپ، قۇرعىر-اۋ،
ەسكى اڭىزدى ەسكە سالعان كۇن مىناۋ!
«ساراڭ بايلار ءجۇن جەپ، قۇسقان جاباعى
بولىس بوپتى» دەگەن سوزگە كۇلدىك-اۋ...
اۋىلنايلار، پوشتابايلار – ءبارى دە
كەتكەن دەيدى يت جەككەننەن ارىگە!..
ايتسەدە ەلدە اقىندارى كور سوقىر
اۋزى قيسىق اكىم سويلەر ءالى دە!..
شەتەل اسىپ ءبىلىم قۋعان بالا كوپ،
ورالدى ما سونىڭ ءبارى دانا بوپ؟..
شەنەۋنىكتەر جەر تەپسىنىپ جەتسە ەگەر،
بىلەگىمدى سىبانباسقا شارا جوق!..
بالا كەزدە تاسقا ۇرىلعان ماڭدايىم
جارقىراپ تۇر،
تۋعان شىعار ەندى ايىم!
كەۋدەمسوقتار كىشىرەيىپ كەلسە ەگەر،
قۇشاق جايا قارسى الۋعا مەن دايىن!
باق پەن سورى بىرگە تۋعان دارىننىڭ،
الاساپىران كۇندەرىمدى ساعىندىم!
ساناما ەنگەن ىزالى ويدان ايتسە دە،
ايتارىمدى ايتىپ بارىپ ارىلدىم!
ارمان قاني،
پاۆلودار قالاسى.
*باقىتجان ساعىنتاەۆ، ەرلان ارىن، قانات بوزىمباەۆ – پاۆلودار وبلىسىنىڭ ەكس-اكىمدەرى
