1. «Táýelsizdik» jyry
Pavlodarda «Táýelsizdik» dańǵylynyń ataýy qoǵamdyq tyńdaýǵa usynylmaı-aq «Nursultan Nazarbaev» ataýyna asyǵys aýystyrylyp jiberildi! Elbasynyń esim-soıyn berýge Astana, Lomov, Lermontov, I Maı kósheleri de laıyqty ekenin oblys ákimi Bolat Baqaýov pen qala ákimi Ánýar Kúmpekeev eskergen joq.
«Táýelsizdik», qasıetti jyrsyń sen,
Arýaqty erdiń rýhy keshsin – kúrsinsem!
Kózge elestep Malaısary sııaqty,
Jasybaıdaı túsime enip júrsiń sen!..
Qaraly kósh Qarataýdan sabylǵan
Jetti Ertiske súńgip ótip saǵymnan...
Jetim úmit jylap qaldy quzartta
Kenesary hannyń basy shabylǵan!..
Magadannan qaıtsa qazdar tizbegi,
Kerekýde óksıdi aspan kúzdegi!..
«Býtyrkada» qan-josa bop
Tarıhtyń
Betine endi Aımaýytov izderi!..
Keıde eriksiz úıirli ıtpen talastym,
Qasqyrsha ulyp kókjalmen de jarastym!
Darda sońǵy demi úzilgen
Stýdent
Rysqulbekov rýhy edi ǵoı Alashtyń!..
Júıkem álsiz, bálkim erteń syr berer,
Biz ketermiz – ornymyzǵa kim keler?..
Shyndyqty izdep júrgen jannyń aldynan
Shyqsa egerde avtozak pen túrmeler!..
Turǵanymen temir tártip kúshinde,
Torǵa tússeń ór eńseńdi túsirme!
Demokratııa
Dárigerge jaltaqtap
Júrgen joq qoı jyndyhana ishinde!..
Syndarly shaq jibermeıdi esesin,
Sumdyq oımen túrli qııal keshesiń!
Tynyshtyǵyn túnniń dar-dar aıyryp,
Izdep kelem «Táýelsizdik» kóshesin!..
2. Ákimder men aqyndar
«Táýelsizdik» jaıyndaǵy tolǵanys –
Endi júdeý kóńilime aldanysh.
Baıyptasam, ónege eken ózgege
Saǵyntaev Baqytjannan* qalǵan is!
Ákimderdi sóz etpeıin desem de,
Týdyrady sezimimde tańdanys:
Erlan Aryn* qanyndaǵy tektilik,
Bozymbaev* boıyndaǵy ar-namys!
Biz solardyń qurmetine bólendik,
Tórge shyǵyp tóremen de teńeldik!
Baqaýovtyń keńsesinen, áıtse de,
Baıqala ma bıiktik pen tereńdik?..
Atqa mingen, taqqa mingen kisimen
Sálemdesý ońaı emes,
Túsinem...
Endi, sirá, keńdik izdeý kúlkili,
Kúmpekeev kabıneti ishinen...
Egiz shyǵar baılyq, mansap, qurǵyr-aý,
Eski ańyzdy eske salǵan kún mynaý!
«Sarań baılar jún jep, qusqan jabaǵy
bolys bopty» degen sózge kúldik-aý...
Aýylnaılar, poshtabaılar – bári de
Ketken deıdi It jekkennen árige!..
Áıtsede elde aqyndary kór soqyr
Aýzy qısyq ákim sóıler áli de!..
Shetel asyp bilim qýǵan bala kóp,
Oraldy ma sonyń bári dana bop?..
Sheneýnikter jer tepsinip jetse eger,
Bilegimdi sybanbasqa shara joq!..
Bala kezde tasqa urylǵan mańdaıym
Jarqyrap tur,
Týǵan shyǵar endi Aıym!
Keýdemsoqtar kishireıip kelse eger,
Qushaq jaıa qarsy alýǵa men daıyn!
Baq pen sory birge týǵan darynnyń,
Alasapyran kúnderimdi saǵyndym!
Sanama engen yzaly oıdan áıtse de,
Aıtarymdy aıtyp baryp aryldym!
Arman QANI,
Pavlodar qalasy.
*Baqytjan Saǵyntaev, Erlan Aryn, Qanat Bozymbaev – Pavlodar oblysynyń eks-ákimderi
