وسكەمەن قالاسىندا ازىق-تۇلىك دۇكەنى ورتەنىپ، 30 ادام ەۆاكۋاتسيالاندى. بۇل تۋرالى شىعىس قازاقستان وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
وقيعا 22 ماۋسىمدا ساعات 04.40-تا ساتباەۆ داڭعىلىنداعى ازىق-تۇلىك دۇكەنىندە بولعان. دۇكەن ون قاباتتى تۇرعىن ءۇيدىڭ 1-قاباتىندا ورنالاسقان. ساۋدا جابدىقتارى مەن ازىق-تۇلىك ونىمدەرى جانىپ كەتكەن.
مالىمەت بويىنشا، وقيعا ورنىنا كەلگەن شقو تجد قىزمەتكەرلەرى باسپالداق ارقىلى 30 ادامدى، ونىڭ ىشىندە 6 بالانى ەۆاكۋاتسيالادى. ءورت ساعات 05.40-تا 25 شارشى مەتر الاڭدا ءسوندىرىلدى. قايتىس بولعاندار مەن زارداپ شەككەندەر جوق.
سونداي-اق، ءورتتى سوندىرۋگە جەكە قۇرامنان 35 ادام جانە 11 تەحنيكا جۇمىلدىرىلدى.
ءورتتىڭ الدىن الا سەبەپتەرى – ەلەكتر جابدىعىنىڭ اۆاريالىق جۇمىس رەجيمى جانە ەلەكتر جابدىعىن ورناتۋ مەن پايدالانۋ كەزىندە ءورت قاۋىپسىزدىگى تالاپتارىن ساقتاماۋ.شقو تجد كاسىپكەرلەرگە ءورت قاۋىپسىزدىگى ەرەجەلەرىن ساقتاۋدى ەسكەرتەدى.
ۇقساس جاڭالىقتار
