نەگە ءبىزدىڭ ەلىمىز توتەنشە جاعدايلارعا قاۋقارسىز؟ سەبەپتەرى تومەندەگىدەي دەپ ويلايمىن:
1. جۇيەلى جەمقورلىق. مينيسترلىكتەن باستاپ، وبلىستىق قۇرىلىمدارعا دەيىن.
2. وبلىس باسقارۋداعى تەحنوگەندىك جانە ادامي فاكتورلاردان تۋىندايتىن توتەنشە جاعدايلارعا نەمقۇرايلىق. وبلىس اكىمىنەن باستاپ، اۋىل دەڭگەيىنە دەيىنگى اكىمدەردىڭ توتەنشە جاعدايعا قالدىقتىق پرينتسيپتە ءمان بەرۋى.
3. ينفراقۇرىلىمنىڭ توزۋى. جىل سايىن قاراجات بولىنگەنمەن، كوررۋپتسيادان وبلىستار قاجەتتى تەحنيكامەن جابدىقتالمايدى.
4. مىقتى پروفەسسيونالداردىڭ، ءوز سالاسىنىڭ كاسىبي ماماندارىنىڭ از بولۋى. جالاقىنىڭ ماردىمسىزدىعى.
5. وتكەننەن ساباق الماۋ. تۇركىستان، قىزىلوردا، قاراعاندى وبلىستارىن سۋ باسىپ، قوستاناي، اباي وبلىستارىن ءورت شالسا دا، ءبىر كۇندىك ازا تۇتۋمەن قايتىس بولعان ادامداردى ەسكە الىپ، تەز ۇمىتۋ. قۇزىرلى ورگان باسشىلارى ساباق المايدى. ەڭ وكىنىشتىسى — قاتەلىكتەر جىل وتكەن سايىن قايتالانىپ، جاڭا كولەم الۋدا.
الدىن الۋ ءۇشىن نە ىستەۋ كەرەك؟
1. الدىن الۋ نەمەسە پرەۆەنتيۆتى شارالار الگوريتمىن دايىنداۋ. حالىقتى ۇنەمى حابارلاندىرىپ وتىرۋ. ول جاعىنان وبلىستارداعى بارلىق سالالاردا تولىق تاۋەلسىز اۋديت جاساپ، شىنايى جاعدايعا رەاليستىك كوزقاراسپەن قاراۋ;
2. ينفراقۇرىلىمدىق رەفورما كەرەك. قاجەتسىز ورگانداردى جاۋىپ، ءموبيلدى قىزمەتتەردى زاماناۋي تەحنولوگيامەن جابدىقتاپ، مامانداردى قايتا دايارلاۋدان وتكىزۋ. ءاربىر 2 جىلدا جاڭا ادىستەر مەن تەحنولوگيالارعا ۇيرەتۋ.
3. توتەنشە جاعداي سالاسىنداعى مامانداردىڭ جالاقىسىن كوبەيتۋ، ولارعا الەۋمەتتىك ساتى دەڭگەيىن جاڭا مودەلمەن قاراۋ.
قازاقستاننىڭ ىشىندەگى توتەنشە جاعدايدى رەتتەي الماي وتىرعاندا، سىرتتان كەلەتىن (سۋ تاپشىلىعى، توپىراق ەروزياسى، اۋانىڭ ەكولوگيالىق لاستانۋى) توتەنشە جاعدايلارعا مۇلدەم دايىن ەمەس ەكەنىمىزدى مويىنداۋ كەرەك. ونداي جاعدايدا سوعىسسىز اق جەڭىلەتىن بولامىز.
ۇقساس جاڭالىقتار
