پەتروپاۆلدا كارىزدەگى اپاتقا بايلانىستى توتەنشە جاعداي ەنگىزىلگەنى حابارلاندى، - دەپ جازادى "ادىرنا" ءتىلشىسى Petropavlovsk.news باسىلىمىنا سىلتەمە جاساپ.
پەتروپاۆل اكىمى جۋكوۆ پەن نۇرسۇلتان نازارباەۆ كوشەلەرىنىڭ اۋدانىنداعى كارىز كوللەكتورىندا بولعان اپاتقا بايلانىستى توتەنشە جاعداي ەنگىزىلگەنىن حابارلادى.
كوللەكتور 1956 جىلى سالىنعان دەپ حابارلايدى. قۇرىلىستىڭ توزۋى سالدارىنان اپاتتار جيىلەپ كەتتى. كوللەكتوردىڭ تولىق توقتاپ قالۋىنا جول بەرمەۋ ءۇشىن بۇل اۋماققا جەدەل جوندەۋ جۇمىستارىن جۇرگىزۋ قاجەت.
قالا اكىمدىگى كوللەكتوردى جەدەل جوندەۋ ءۇشىن جەرگىلىكتى تەحنوگەندىك توتەنشە جاعداي جاريالاۋ تۋرالى شەشىم قابىلدادى. ءتيىستى قۇجات قازىر نورماتيۆتىك قۇقىقتىق اكتىلەر پورتالىندا قارالۋدا.
"ازىرگە كوللەكتور جۇمىس ىستەپ تۇر. توتەنشە جاعداي اياسىندا 700 مەتر كارىز قۇبىرىن تەز ارادا جوندەيمىز. "قىزىلجار سۋ" جۇمىسىن باستادى", - دەدى اكىمدىك وتىرىسىندا قالا اكىمى سەرىك مۇحامەديەۆ.
توتەنشە جاعداي 9 قاراشادا ەنگىزىلەدى دەپ حابارلاندى. كوللەكتور زەرتتەلىپ، «قىزىلجار سۋ» جشس كۇردەلى جوندەۋ جۇمىستارىن باستاپ جاتىر. بۇل ماسەلە وبلىس، قالا باسشىلىعىنىڭ باقىلاۋىندا. قالا اكىمدىگى دە الاڭداۋعا نەگىز جوق ەكەنىن، جۇمىس ادەتتەگىدەي جۇرگىزىلەتىنىن ايتتى.
جەرگىلىكتى باسىلىم اتاپ وتكەندەي، بۇل پەتروپاۆلدا سوڭعى ءبىر ايداعى ەكىنشى ءىرى كارىز قۇبىرىنىڭ جارىلۋى. 18 قازاندا اباي كوشەسىندە تاعى ءبىر كوللەكتوردا ءىرى اپات بولدى. جوندەۋ جۇمىستارى جاقىندا عانا اياقتالدى. ال جول جۇرۋگە رۇقسات بىرنەشە كۇن بۇرىن عانا اشىلعان بولاتىن.
