پەتر كاريموۆتىڭ وزبەكستاننىڭ تۇڭعىش پرەزيدەنتىنىڭ جەسىرى تاتيانا كاريموۆاعا قاتىستى تالاپ ارىزى تاشكەنت قالاسىنىڭ ازاماتتىق ىستەر جونىندەگى ياككاساراي اۋدانارالىق سوتىندا قارالادى، دەپ حابارلايدى “ادىرنا” ۇلتتىق پورتالى ازاتتىقتىڭ وزبەك بولىمىنە سىلتەمە جاساپ.
26 ماۋسىمعا بەلگىلەنگەن وتىرىس تۋرالى اقپارات جوعارعى سوتتىڭ سايتىندا سوت وتىرىستارىنىڭ كەستەلەرى بولىمىندە ورنالاستىرىلعان.
تاشكەنت قالالىق سوتىنىڭ سايتىندا جازىلعانداي، قارالاتىن ءىس «مۇراگەرلىك قۇقىعىنان تۋىندايتىن داۋلارعا» قاتىستى.
ايتا كەتەيىك، پەتر كاريموۆ - وزبەكستاننىڭ تۇڭعىش پرەزيدەنتى يسلام كاريموۆتىڭ ناتاليا كۋچمامەن نەكەسىنەن تۋعان تۇڭعىش بالاسى. ول 1969 جىلى دۇنيەگە كەلگەن. سول جىلى يسلام كاريموۆ پەن ناتاليا كۋچما اجىراسقان. ناتاليا كۋچما 2008 جىلى تاشكەنتتە قايتىس بولدى.
54 جاستاعى پەتر كاريموۆ 1990 جىلداردان بەرى ماسكەۋدە تۇرادى.
1988 جىلى تاشكەنت حالىق شارۋاشىلىعى ينستيتۋتىن بىتىرگەن پەتر ءبىراز ۋاقىت بانك-قارجى سالاسىندا جانە «وزبەكستان اۋە جولدارى» ۇلتتىق اۆياكومپانياسىنىڭ ماسكەۋدەگى وكىلدىگىندە جۇمىس ىستەگەنى بەلگىلى.
2018 جىلى «Uzbekistan Airways» ۇلتتىق اۋە كومپانياسىندا بىرنەشە جىل جۇمىس ىستەگەن پەتر كاريموۆ جۇمىس بەرۋشىنى سوتقا بەردى. پەتر كومپانيانى 2017 جىلى اكەسى قايتىس بولعاننان كەيىن جۇمىستان شىعاردى جانە وعان قارىز اقشا تولەمەگەن دەپ ايىپتادى. سول جىلدىڭ اياعىنا قاراي تالاپكەر مەن جاۋاپكەر اراسىنداعى مەرزىمىنەن بۇرىن بىتىمگەرشىلىك كەلىسىمگە كەلۋگە بايلانىستى ءىس جابىلعان بولاتىن.
وزبەكستاندى ۇزاق جىل باسقارعان يسلام كاريموۆ 2016 جىلى قايتىس بولعان.
