وزبەكستاننىڭ ەكس-پرەزيدەنتى يسلام كاريموۆتىڭ قىزى گۇلنارا كاريموۆاعا تاعى ءبىر ايىپ تاعىلدى، دەپ حابارلايدى "ادىرنا" ۇلتتىق پورتالى.
Reuters اگەنتتىگىنىڭ مالىمەتىنشە، گۇلنارا كاريموۆا شۆەيتسارياداعى ەڭ كونە بانكتەردىڭ ءبىرى - Lombard Odier ارقىلى اقشانى جىلىستاتۋى مۇمكىن دەگەن كۇدىككە ىلىنگەن.
شۆەيتساريا پروكۋرورلارى بانك پەن ونىڭ بۇرىنعى قىزمەتكەرلەرىنىڭ بىرىنە قارسى ايىپ تاقتى. پروكۋرورلاردىڭ ايتۋىنشا، اقشا Lombard Odier-تە اشىلعان توعىز بانك شوتى ارقىلى ەرەجەلەردى بۇزا وتىرىپ اۋدارىلعانى كورسەتىلگەن. بۇل قاراجات كاريموۆا قاتىسقان قىلمىستىق ۇيىممەن بايلانىستى ەكەنى ايتىلدى.
بۇرىنعى پرەزيدەنتتىڭ قىزى گۇلنار كارىموۆا قازىر وزبەكستاندا تۇرمەدە جازاسىن وتەپ جاتىر. ول بىرنەشە ەلدەردە ۇرلىق، بوپسالاۋ جانە قىلمىستىق جەلى قۇردى دەپ ايىپتالعان بولاتىن.
2015 جىلى 18 جەلتوقساندا گۇلنارا كاريموۆانى تاشكەنت قالالىق سوتى – 10 جىلعا، ال 2020 جىلى 18 ناۋرىزدا جاڭا قىلمىستىق ءىس شەڭبەرىندە تاعى 13 جىلعا باس بوستاندىعىنان ايىردى. وعان "قاستاندىققا وقتالدى، قارجى جىلىستاتتى، بوپسالاۋ، جىمقىرۋ جانە توناۋ قىلمىستارىن جاسادى دەگەن ايىپتار تاعىلعان. وزبەكستاندى كوپ جىل باسقارىپ، اياق استىنان قايتىس بولعان اۆتوكرات يسلام كاريموۆتىڭ قىزى گۇلنارا كاريموۆا اكەسى ءتىرى كەزىندە-اق تاشكەنت وبلىسىنداعى ايەلدەر كولونياسىنا قامالعان.
2022 جىلى قازاقستانداعى "قاڭتار قىرعىنىنان" كەيىن قازاقستاننىڭ بۇرىنعى پرەزيدەنتى نۇرسۇلتان نازارباەۆ "قاۋىپسىزدىك كەڭەسىنىڭ توراعاسى" وكىلەتىنەن ايىرىلىپ، تۋىستارى جوعارى قىزمەتتەرىنەن بوساعان. وسىدان كەيىن قازاقستاندا دا نۇرسۇلتان نازارباەۆتىڭ اينالاسىنداعى ادامداردىڭ شەتەلگە "زاڭسىز شىعارعان اقشاسىن قايتارۋ" قولعا الىنعان-دى.
