قىزۋى كوتەرىلىپ، اۋرۋعاناعا بارعان ەر ادامدى شەتەلدە ماسا شاعىپ العانى انىقتالدى، دەپ حابارلايدى "ادىرنا" ۇلتتىق پورتالى Pavlodarnews.kz رەسۋرسىنا سىلتەمە جاساپ.
دەنساۋلىق ساقتاۋ باسقارماسىنىڭ مالىمەتىنشە، 37 جاستاعى قىزىلجارلىق تۇرعىن وبلىستىق اۋرۋحاناعا 38 گرادۋسقا دەيىنگى تەمپەراتۋرا، بورتپە، ەنتىگۋ، السىزدىك، لەتارگيا، بالتىر بۇلشىقەتىنىڭ، بۋىنداردىڭ اۋىرسىنۋى سەكىلدى شاعىمدارمەن كەلگەن.
«ناۋقاس ءبىر اپتا بويى ۇيىندە اۋىرعان، امبۋلاتوريالىق كەزەڭدە ەمدەۋ ناتيجە بەرمەگەن سوڭ ينفەكتسيا بولىمىنە جۇگىندى. تەكسەرۋ كەزىندە ينفەكتسيونيست دارىگەرلەر ءاردايىم باسقا ەلدەرگە بارعان-بارماعانىن سۇرايدى. جىگىت وسى جاقىندا عانا تايلاندتان كەلگەن، ونى جاندىك شاعىپ الىپتى. ەر ادام شۇعىل اۋرۋحاناعا جاتقىزىلدى، كلينيكالىق جانە اسپاپتىق زەرتتەۋ جاسالدى. دياگنوز - دەنگە بەزگەگى. التىنشى كۇنى پاتسيەنت ايىعىپ، ۇيىنە شىقتى»، - دەدى ايماقتىڭ دسب.
سونىمەن قاتار، دەنساۋلىق ساقتاۋ باسقارماسىنىڭ ماماندارى ۆيرۋستىق ينفەكتسيا جايلى اقپارات بەردى.
«دەنگە - ادامعا ماسادان بەرىلەتىن ۆيرۋستىق ينفەكتسيا. تروپيكالىق جانە سۋبتروپيكالىق كليماتى بار ايماقتاردا ءجيى كەزدەسەدى. قازاقستاندا تەك شەتەلدەن اكەلىنگەن جاعدايلار تىركەلەدى، بۇل اۋرۋ بىزگە ءتان ەمەس. ادامنان ادامعا جۇقپايدى. بىراق دەنگە بەزگەگى قان كەتىپ، شوك تۋعىزاتىن، كەيدە ولىمگە اپارىپ سوعاتىن گەمورراگيالىق قىزبا تۋدىرۋى مۇمكىن»، - دەدى دەنساۋلىق ساقتاۋ باسقارماسى.
"ادىرنا" ۇلتتىق پورتالى
