جەر شارىنداعى بىردەن ءبىر تۇيىق سۋ ايدىنى كاسپي تەڭىزىنىڭ سوڭعى جىلداردا تارتىلىپ بارادى. بۇلاي جالعاسا بەرسە، ارالدىڭ كەبىن كيۋى مۇمكىن. اقتاۋدا جەرگىلىكتى دەڭگەيدەگى تابيعي توتەنشە جاعداي رەجيمى ەنگىزىلدى. بۇل شارا كاسپي تەڭىزىندەگى سۋدىڭ سارقىلۋىن شەشۋ ماقساتىندا قولعا الىنىپ وتىر دەپ حابارلاندى، دەپ جازادى "ادىرنا" ۇلتتىق پورتالى.
«7 ماۋسىمنان باستاپ جوبالاۋ-ىزدەستىرۋ جۇمىستارىن جۇرگىزۋ ءۇشىن جەرگىلىكتى اۋقىمداعى تابيعي توتەنشە جاعداي جاريالاۋ تۋرالى شەشىم قابىلداندى» دەپ حابارلايدى قالا اكىمدىگىنىڭ ءباسپاسوز قىزمەتى.
ەكولوگيا ءمينيسترى ءزۇلفيا سۇلەيمەنوۆا كاسپي تەڭىزىنىڭ ەلىمىزدەگى ايماعى ەڭ تاياز اۋماق ەكەندىگىن ەسكە سالىپ، تەڭىزدىڭ سۋى ازايعان سايىن وعان قۇياتىن سۋ دا ازاياتىنىن ايتتى.
بىرىنشىدەن، كاسپي تەڭىزىنە قۇياتىن وزەندەر اعىسى تومەن. تەڭىز - جابىق سۋ ايدىنى. ەكىنشىدەن، سول وزەندەردىڭ گيدرولوگيالىق رەجيمدەرىنە اسەر ەتەتىن كليماتتىڭ وزگەرۋى، - دەپ اتاپ ءوتتى سۇلەيمەنوۆا.
سونىمەن قاتار سۇلەيمەنوۆا بۇل ماسەلە كاسپي ماڭىنداعى ەلدەرمەن تالقىعا سالىنىپ جاتقانىن ايتتى. ونىڭ ايتۋىنا قاراعاندا، بۇل پروبلەمانى كەشەندى تۇردە شەشپەسە تەك قازاقستان ەمەس، كاسپي تەڭىزى جاعالاۋىنداعى وزگە دە مەملەكەتتەر ءۇشىن قاۋىپ اكەلمەك.
ورتا ازيادا سۋ ماسەلەسى ۋاقىت وتكەن سايىن ءورشىپ بارادى. وزبەكستاننىڭ ۇكىمەت باسشىسى استانا قالاسىنداعى فورۋمدا ارال تاعدىرىن ايتىپ، دابىل قاقتى. قىرعىزستان پرەزيدەنتى سادىر جاپاروۆ قىرعىزستاندا سۋ رەسۋرستارىنا اسا ءمان بەرىلىپ، ۇنەمدى پايدالانۋ جولدارى قولعا الىنعانىن ءمالىم ەتتى.
