رەسەي ۇكىمەتى ەدىل-كاسپي تەڭىز كەمە قاتىناسى كانالىن 4,5 مەترگە دەيىن تەرەڭدەتۋ جوباسىنان باس تارتۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى.
بۇل شەشىم قازاقستاننىڭ مۇددەسىنە تىكەلەي اسەر ەتۋى مۇمكىن.
توقتاتۋدىڭ باستى سەبەبى رەتىندە جۇمىستاردىڭ قىمباتتىعى، كاسپي تەڭىزىنىڭ تايىزدانۋى جانە تەرەڭ سۋلى كەمەلەردىڭ از سۇرانىسى ايتىلۋدا.
2023–2024 جىلدارى كانالدى تەرەڭدەتۋگە 7,5 ملرد رۋبلدەن استام قارجى جۇمسالعان. بىراق كاسپي دەڭگەيىنىڭ تومەندەۋى توپىراق قازۋ كولەمىن ارتتىرۋدى تالاپ ەتىپ، جوبانى ەكونوميكالىق تۇرعىدان ءتيىمسىز ەتتى.
روسگيدرومەت بولجامى بويىنشا، الداعى 10–15 جىلدا تەڭىز دەڭگەيىنىڭ تومەندەۋى جالعاسادى.
قازاقستان ءۇشىن بۇل شەشىم ءوز پورتتارىن تەرەڭدەتۋ ىسىنە كەدەرگى كەلتىرۋى مۇمكىن. قازىرگى تاڭدا تەك قۇرىق پورتىنداعى جۇمىستار اياقتالعان، ال اقتاۋ پورتىنداعى جوبا ءالى باستالعان جوق.
ترانسكاسپي حالىقارالىق كولىك ءدالىزى (تحكد) ارقىلى ترانزيت ءوسىپ كەلەدى، بىراق قارقىنى باياۋلاعان. قر كولىك مينيسترلىگىنىڭ دەرەگى بويىنشا، سوڭعى بەس جىلدا جۇك اينالىمى التى ەسە ارتىپ، 4,5 ملن تونناعا جەتكەن، الايدا 2025 جىلدىڭ العاشقى جارتىسىندا ءوسىم بىلتىرعى دەڭگەيمەن سالىستىرعاندا تەك 7%-دى قۇراعان.
ساراپشىلاردىڭ ايتۋىنشا، ەگەر كاسپي تەڭىزىنىڭ دەڭگەيى تومەندەي بەرسە جانە اۋقىمدى تەرەڭدەتۋ جوبالارى جۇزەگە اسپاسا، ءدالىزدىڭ وتكىزۋ قابىلەتى كۇرت تومەندەيدى. بۇل ورتالىق ازيا ەلدەرىن كاسپيدەن اينالىپ وتەتىن بالاما تەمىرجول جانە اۆتوكولىك دالىزدەرىن دامىتۋعا يتەرمەلەۋى مۇمكىن.
