كاسپي تەڭىزىندەگى سۋ دەڭگەيىنىڭ تومەندەۋى كەمە قاتىناسىنا ەلەۋلى قيىندىقتار تۋعىزىپ، ورتا ءدالىزدىڭ تيىمدىلىگىنە قاۋىپ توندىرۋدە. بۇل تۋرالى باكۋدەگى كليماتتىق ءىس-قيمىل اپتالىعى – BCAW 2026 اياسىندا وتكەن پانەلدىك سەسسيادا «ازەربايجان كاسپي تەڭىز كەمە قاتىناسى» جاق-تىڭ (ASCO) تۇراقتى دامۋ جانە شىعارىندىلاردى باسقارۋ جونىندەگى ديرەكتورى الەكپەر ازيزلي ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، كاسپي تەڭىزىنىڭ تايازدانۋ ماسەلەسى سوڭعى ءۇش جىلدان بەرى بايقالىپ كەلەدى. سۋ دەڭگەيىنىڭ تومەندەۋى ساۋدا فلوتى كەمەلەرىنىڭ جۇكتەلۋىنە تىكەلەي اسەر ەتىپ وتىر. ماسەلەن، بۇگىندە ASCO پارومدارىنىڭ ءبىرى قازاقستاننان تاسىمالداناتىن جۇكتىڭ بۇرىنعى كولەمىنىڭ نەبارى 80 پايىزىن عانا قابىلداي الادى.
«بۇل تەك ASCO ءۇشىن عانا ەمەس، بۇكىل مەملەكەت ءۇشىن قارجىلىق شىعىندارعا اكەلەدى. سونىمەن قاتار ماسەلە تەك ازەربايجانعا عانا ەمەس، بۇكىل ورتا دالىزگە جانە ونى پايدالاناتىن تۇتىنۋشىلارعا اسەر ەتۋدە»، – دەدى ازيزلي.
ول سونداي-اق قىزمەت كورسەتۋشى فلوتتاعى جاعدايدىڭ بۇدان دا كۇردەلى ەكەنىن اتاپ ءوتتى. سۇيرەتكىش، جابدىقتاۋ جانە گەولوگيالىق زەرتتەۋ كەمەلەرى كەن ورىندارىنداعى پلاتفورمالاردىڭ ايلاقتارىنا جاقىنداي الماي وتىر. وسىنداي قيىندىقتار ءاليات پورتىندا عانا ەمەس، تۇركىمەنستان مەن قازاقستان پورتتارىندا دا تىركەلۋدە.
ازيزلي سۋ استىندا قالعان بۇرعىلاۋ قوندىرعىلارى مەن قۇبىرلار كەمەلەردىڭ كورپۋسىنا زاقىم كەلتىرۋ قاۋپىن ارتتىراتىنىن دا ايتتى. ونىڭ سوزىنشە، بۇل ماسەلەلەر كاسپي باسسەينىندەگى كەمە قاتىناسىنا قاتىسۋشىلاردىڭ بارلىعى ءۇشىن كۇن وتكەن سايىن وزەكتى بولىپ بارادى.
