ەڭ ۇلكەن قاۋىپ نەمەسە “سۋ مينيسترلىگى” قاشان قۇرىلادى؟
قۇرعاقشىلىق - ۇلتتىق قاۋىپسىزدىك تاقىرىبىنا اينالىپ بارا جاتىر. ارال، كاسپي، بالقاش، سىرداريا، ەسىل، جايىق تىزە بەرسەك، بىرىنەن سوڭ ءبىرى تابانى قۇرعاپ، ونداعى بيوالۋاندىلىق ءتۇرى جويىلىپ، زاردابى ولشەۋسىز داعدارىسقا اپارا جاتىر!
سۋ قورلارىمىز ازايىپ، ەلىمىزدە ءشولدى جانە شولەيتتى جەرلەردىڭ اۋماعى ۇلكەيىپ، قۇم استىنا كومىلىپ بارا جاتقانىمىزدى قالالاردا اسىرەسە استانا قالاسىنداعى سالقىن جەلدەتكىشتە وتىرعان مانساپ يەلەرى تۇسىنە قويارى شامالى. قالاي دەسەكتە وسى استانادا، بۇگىننىڭ وزىندە اۋىز سۋ تاپشىلىعى قاتتى بايقالىپ، جىلداپ ەمەس، كۇن ساناپ وتە وتكىر تاقىرىپقا اينالۋدا.
اۋىز سۋدى ىسىراپقا اينالدىرىپ جاتقانىن، سارىلداتىپ اعىزىپ، كوپقاباتتىڭ بىرىندە تاڭەرتەڭ جانە كەشكە ءتىسىن جۋىپ تۇراتىن ميلليونداعان تۇرعىننىڭ قانشاسى ويلانىپ جاتىر دەيسىز…؟!
سول ۇشىندە ترانسشەكارالىق، جەر استى، كولدەر مەن تەڭىزدەردى، وزەندەر مەن جالعىز داريامىزدىڭ سۋىن ناقتى باقىلاۋعا الاتىن، ناعىز “ادىلەتتى قازاقستاننىڭ” دارىندى جاس ماماندارىنان تۇراتىن «سۋ مينيسترلىگىن» دەرەۋ قۇرۋ قاجەت!
الەمدىك جىلىنۋعا بەيىمدەلۋ تۇستارىن ەسكەرىپ، بۇل داعدارىستان الىپ شىعار، تىكەلەي كوميتەت دارجەسىندە مينيسترلىك ساياساتىنان شىعا الماي جۇرگەن سالانى، ۆەدومستۆالىق دارەجەگە كوتەرىپ، ۇلتتىق قاۋىپسىزدىك دەڭگەيىندە عىلىمعا تىكەلەي باعىت العان جاۋاپتى سالا قۇرىلۋى ءتيىس!
بۇل - الەمدىك تاجىريبە. كورشى وزبەك ەلىنىڭ وزىندە بۇل ەرتەرەكتەن ساقتالىپ قالعان ۆەدومستۆا. سوندىقتان دا تىكەلەي ترانسشەكارالىق نەمەسە ىشكى سۋ ماسەلەسىندە ءوز پوزيتسيالارىندا نىق ەكەنىن بايقاتادى. ءارى بۇل سالانى عىلىممەن تىعىز بايلانىستىرىپ، جاڭاشا تىڭ جاڭالىقتار جاساۋعا تولىق مۇمكىندىك بار.
سۋ - تىرشىلىك كوزى. الەم مەن ادامزاتتىڭ باستى قاجەتتىلىگى. بۇل مۇناي مەن گازدان، التىن مەن مەتالدان دا قىمبات قازىنا ەكەنىن الدە قاشان تۇسىنگەن الەم، سۋ ۇنەمدەۋ مادەنيەتىن دامىتىپ كەتكەلى قاي زامان… سوندىقتان دا بولاشاق ۇرپاقتى تىرشىلىك كوزىنەن ايىرماۋدىڭ امالىن جاساعانىمىز ابزال، قىمباتتى ۇكىمەت!!!
