تاليبان يراننىڭ شەكارا بەكەتىنە شابۋىل جاسادى. ەكى شەكاراشى مەرت بولدى دەلىنەدى

2072
Adyrna.kz Telegram

تاليبان سودىرلارى يران شەكارا بەكەتىنە شابۋىل جاساۋ ءۇشىن ادام كۇشى مەن بروندى تەحنيكانى پايدالاندى، دەپ جازادى "ادىرنا" پورتالى. بۇل تۋرالى اۋعان ءجۋرناليسى تاجۋدەن سورۋش Twitter-دە جازدى. ول تاليبان جاريالاعان كادرلاردى تاراتقان. ەكى يراندىق شەكاراشىنىڭ قازا تاپقانى تۋرالى الدىن الا مالىمەت بار.

جاريالانعان ۆيدەودا تاليبان جەتەكشىلەرىنىڭ شەكارالىق ايماقتاعى يراندىق بازاعا جاقىنداعانىن كورۋگە بولادى.

«اقساقالدار جيھادقا رۇقسات بەرسە، ءبىز جاقىن ارادا يراندى جاۋلاپ الامىز»، - دەدى باسشىلاردىڭ ءبىرى.

ال اۋعانستاننىڭ ۇلتتىق قورعانىس مينيسترلىگى اشىق وق اتقانى ءۇشىن يران كۇشتەرىن ايىپتادى.

"وكىنىشكە قاراي، بۇگىن تاعى دا يراندىق اسكەرلەر اۋعانستاننىڭ نيمروز پروۆينتسياسىنىڭ كانگ ايماعىنىڭ شەكارالىق اۋداندارىندا وق جاۋدىرىپ، ۇرىس باستادى. يسلام امىرلىگى تەرىس شارالار مەن سوعىس سەبەپتەرىن ىزدەۋ ەمەس، ديالوگتى كەز كەلگەن ماسەلەنى شەشۋدىڭ اقىلعا قونىمدى جولى دەپ سانايدى»، - دەلىنگەن يسلام امىرلىگىنىڭ حابارلاماسىندا.

ءوز كەزەگىندە يران تاراپى قاقتىعىسقا اۋعانستان تاراپىن كىنالايدى.

يران اسكەريلەرىنىڭ مالىمەتىنشە، تاليبان كۇشتەرى شابۋىلدى «حالىقارالىق قۇقىق پەن تاتۋ كورشىلىك قاعيداتتارىن» بۇزا وتىرىپ باستادى جانە يسلام رەسپۋبليكاسىنىڭ «شەكارا قىزمەتىنىڭ تاباندى جانە باتىل قارسىلىعىنا» تاپ بولدى.

«ءبىز اۋعانستاننىڭ قازىرگى بيلەۋشىلەرىن مويىندامايمىز جانە اۋعانستاندا ينكليۋزيۆتى ۇكىمەت قۇرۋ قاجەتتىگىن تالاپ ەتەمىز»، - دەدى يران سىرتقى ىستەر مينيسترلىگى.

1996-2001 جىلدار ارالىعىندا اۋعانستانداعى العاشقى تالىپتەر بيلىگى كەزىندە مازاري-شاريف قالاسىنداعى كونسۋلدىقتا 10 يراندىق ديپلوماتتى تالىپتەر ءولتىردى. بۇل يراننىڭ اسكەري جۇمىلدىرىلۋىنا اكەلىپ سوقتى، ول بۇۇ-نىڭ ارالاسۋىمەن شەشىلدى.

2001 جىلى اقش-تىڭ اۋعانستانعا باسىپ كىرۋى كەزىندە يران اقش اسكەرىمەن ىنتىماقتاسادى جانە گەراتتى باسىپ الۋ كەزىندە يراننىڭ ارنايى كۇشتەرى سولتۇستىك اليانسقا قولداۋ كورسەتتى. 2021 جىلدىڭ جازىندا اقش ەلدەن كەتكەننەن كەيىن تاليبان اۋعانستانداعى بيلىگىن قالپىنا كەلتىردى.

"ادىرنا" ۇلتتىق پورتالى

 

پىكىرلەر