عىلىم جانە جوعارى ءبىلىم ءمينيسترى ساياسات نۇربەك الماتى قالاسىنا جۇمىس ساپارى بارىسىندا 980 ورىندىق قازاقستان-بريتان تەحنيكالىق ۋنيۆەرسيتەتىنىڭ ستۋدەنتتىك جاتاقحاناسىنىڭ قۇرىلىس بارىسىمەن تانىستى، دەپ حابارلايدى «ادىرنا» ءتىلشىسى.
«جوسپار بويىنشا ىسكە قوسۋ مەرزىمى – 2023 جىلدىڭ جەلتوقسانى. سالىنىپ جاتقان جاتاقحانادا ستۋدەنتتەردىڭ تۇرۋىنا، وقۋىنا جانە دەمالۋىنا بارلىق قاجەتتى جانە جايلى جاعدايلار جاسالادى»،—دەدى باسقارما باسشىسى.
مينيستر الماتى قالاسىندا ستۋدەنتتىك جاتاقحانالاردىڭ تاپشىلىق ماسەلەسى ءالى دە بار ەكەنىن اتاپ ءوتتى.
«بۇگىندە مۇندا 29 745 ستۋدەنت تۇراتىن 96 جاتاقحانا بار. قازىر قاجەتتىلىك 32 مىڭنان استام توسەك-ورىندى قۇرايدى. وتكەن جىلى حالىقتىڭ الەۋمەتتىك وسال توپتارىنداعى ستۋدەنتتەرگە ورىن بەرۋ ماسەلەسىن شەشۋ ءۇشىن ارنايى شتابتىڭ جۇمىسى ۇيىمداستىرىلدى.
جاتاقحانا تاپشىلىعىن ازايتۋ ماسەلەسى بويىنشا مەملەكەت بيزنەسپەن بەلسەندى جۇمىس جۇرگىزۋدە. 2022 جىلى مەملەكەتتىك تاپسىرىس بويىنشا قالا كاسىپكەرلەرى مەن قارجى ورتالىعى اراسىندا قولدانىستاعى 4 نىساندى 659 ورىندىق جاتاقحاناعا قايتا فورماتتاۋ بويىنشا كەلىسىمشارتتار جاسالدى. بۇگىنگى كۇنى بارلىق نىسان ىسكە قوسىلدى.
1492 توسەك-ورىنعا ارنالعان تاعى 5 نىسان 2023 جىلدىڭ 1 قىركۇيەگىنە دەيىن، ال 450 توسەك-ورىنعا ارنالعان 2 نىسان 2023 جىلدىڭ سوڭىنا دەيىن قايتا جاڭعىرتىلادى دەپ جوسپارلانۋدا. بۇدان باسقا، جىل سوڭىنا دەيىن جاڭا 3 ستۋدەنتتىك جاتاقحانانىڭ قۇرىلىسىن اياقتاۋ جوسپارلانۋدا (سولاردىڭ ءبىرى – جوعارىدا اتالعان قبتۋ جاتاقحاناسى)»،—دەدى ول.
ساياسات نۇربەك بيزنەس وكىلدەرىمەن كەلىسسوزدەردى جالعاستىراتىنىن جەتكىزدى.
«قازىر قارجى ورتالىعىنىڭ باعدارلاماسى ارقىلى ءوز ەسەبىنەن جاتاقحانا سالۋعا دايىن 93 الەۋەتتى ينۆەستوردىڭ ءتىزىمى جاسالدى. جۇزەگە اسىرىلاتىن باعدارلاما جانە وعان قاتىسۋ شارتتارى تۋرالى تولىق اقپارات ارنايى https://studdom.fincenter.kz/ سايتىندا ۇسىنىلعان»،—دەدى مينيستر.
