ستۋدەنتتەردى باسپانامەن قامتاماسىز ەتۋ ماسەلەسى تولىق شەشىلگەن جوق. بۇل تۋرالى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورىننان كەيىنگى ءبىلىم كوميتەتى توراعاسىنىڭ مىندەتىن اتقارۋشى اقەركە ابىلايحان مالىمدەدى، دەپ حابارلايدى «ادىرنا» ءتىلشىسى.
ايتۋىنشا، بۇگىندە ەل بويىنشا ورىن تاپشىلىعى شامامەن 8 مىڭدى قۇرايدى، ال ەڭ كۇردەلى جاعداي الماتى قالاسىندا ساقتالىپ وتىر.
«ستۋدەنتتەر باسپاناسىز قالمايدى. قازىرگى تاڭدا ماسەلە تولىق شەشىلگەن جوق. بىزدە ۋنيۆەرسيتەت جانىنداعى جاتاقحانالار بار، وندا الەۋمەتتىك وسال ساناتتاعى ستۋدەنتتەر مەن ۇلكەن قالاعا العاش كەلگەن ءبىرىنشى كۋرس ستۋدەنتتەرى ورنالاستىرىلادى. بۇگىنگى تاڭدا 6 160 ستۋدەنت حوستەلدەردە، ال تاعى 1 027 ستۋدەنت قوناقۇيلەردە تۇرىپ جاتىر»،–دەدى ول.
2018 جىلدان بەرى ەلىمىزدە 62 مىڭ ورىنعا ارنالعان 250-دەن استام جاتاقحانا سالىندى. بۇل نىساندار مەملەكەتتىك-جەكەمەنشىك ارىپتەستىك باعدارلاماسى اياسىندا بوي كوتەردى. ستۋدەنتتەردى ورنالاستىرۋ ءۇشىن مەملەكەت سۋبسيديا بولەدى، سول سەبەپتى ينۆەستورلارعا قۇنىن 40 مىڭ تەڭگەدەن اسىرماۋ تۋرالى تالاپ قويىلعان.
اقەركە ابىلايحاننىڭ ايتۋىنشا، الماتى، استانا قالالارىندا جاتاقحانانىڭ ايلىق اقىسى 20 مىڭ تەڭگەدەن باستالادى. ۋنيۆەرسيتەت جانىنداعىلاردىڭ باعاسى 30 مىڭ تەڭگەگە دەيىن بارادى.
