بۇگىن پاريج قالاسىندا (فرانتسيا) جوعارى ءبىلىم جانە عىلىمي زەرتتەۋلەر سالاسىنداعى ىنتىماقتاستىق تۋرالى دەكلاراتسياعا قول قويىلدى. قۇجاتقا قازاقستان رەسپۋبليكاسى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ پەن فرانتسيا رەسپۋبليكاسىنىڭ ەۋروپا جانە سىرتقى ىستەر مينيسترلىگى جانىنداعى سىرتقى ساۋدا، ەكونوميكالىق تارتىمدىلىق جانە شەتەلدەگى فرانتسۋز ازاماتتارى جونىندەگى مينيستر-دەلەگات وليۆە بەشت قول قويدى.
قازاقستان مەن فرانتسيا ەكى ەلدىڭ ۋنيۆەرسيتەتتەرى مەن عىلىمي-زەرتتەۋ ينستيتۋتتارى اراسىنداعى ىنتىماقتاستىقتى دامىتۋ تۋرالى كەلىسىم جاساستى. ەكى ەل بىرلەسىپ، ءبىلىم بەرۋ جانە قوس ديپلومدىق باعدارلامالاردى جۇزەگە اسىرۋعا قولداۋ كورسەتەدى. سونداي-اق كەلەشەكتە سوربوننا-قازاقستان ينستيتۋتىن ترانسفورماتسيالاۋ بويىنشا جۇمىستى ودان ءارى جالعاستىرۋ جوسپارلانۋدا.
قازاقستان مەن فرانتسيا اراسىنداعى اكادەميالىق ۇتقىرلىق پەن عىلىمي ىنتىماقتاستىق بايلانىس اياسىندا ەكى ەل دە ستۋدەنت، وقىتۋشى، زەرتتەۋشى جانە مامان الماستىرۋ ءىسىن ودان ءارى جالعاستىرادى.
«ءبىز فرانتسيامەن اراداعى دەكلاراتسياعا قول قويدىق. قر عىلىم جانە جوعارى ءبىلىم مينيسترلىگى «بولاشاق» باعدارلاماسىنىڭ تىزىمىنە جاڭا فرانتسۋز ۋنيۆەرسيتەتتەرىن ەنگىزۋ مۇمكىندىگىن قاراستىرۋعا دايىن. فرانتسيادا تاعىلىمدامادان ءوتۋ ءۇشىن ءبىز قازاقستان مەن فرانتسيا مەكەمەلەرى اراسىندا «500 عىلىمي تاعىلىمداما» اتتى باعدارلامانى بىرلەسىپ ناسيحاتتاۋدى ءجون كورىپ وتىرمىز. ماگيسترانتتار مەن دوكتورانتتارعا ارنالعان «اباي-ۆەرن» شاكىرتاقىلىق باعدارلاماسى ودان ءارى جالعاسادى. سونىمەن قاتار فرانتسيانىڭ ورتالىق ازيانى زەرتتەۋ ينستيتۋتى قازاقستاندىق جانە فرانتسيالىق ۇمىتكەرلەر ءۇشىن گۋمانيتارلىق جانە الەۋمەتتىك عىلىمدار سالاسىنداعى عىلىمي ۇتقىرلىق باعدارلامالارىنا قولجەتىمدىلىكتى جەڭىلدەتەتىن بولادى», – دەدى مينيستر ساياسات نۇربەك.
ءمينيستردىڭ ايتۋىنشا، اتالمىش دەكلاراتسيا قازاقستان مەن فرانتسيا اراسىنداعى جوعارى ءبىلىم جانە عىلىمي زەرتتەۋلەر سالاسىنداعى ەكىجاقتى قارىم-قاتىناستاردى دامىتۋعا ىقپال ەتەدى.
