قازاقستان مەن رەسەي ءبىلىم بەرۋ سالاسىنداعى ىنتىماقتاستىقتى كەڭەيتەتىنىن مالىمدەدى، دەپ حابارلايدى "ادىرنا" ۇلتتىق پورتالى.
ەكى ەل بىرلەسىپ التى مەكتەپ سالۋ تۋرالى كەلىسىمگە كەلدى. بۇل تۋرالى رەسەيدىڭ سىرتقى ىستەر ءمينيسترى سەرگەي لاۆروۆ قازاقستاندىق ارىپتەسى ەرمەك كوشەرباەۆپەن كەزدەسۋدەن كەيىن مالىمدەدى.
شەتەلدىك ءمينيستردىڭ ايتۋىنشا، جوبانىڭ اياسىندا قازاقستان اۋماعىندا ءۇش رەسەيلىك مەكتەپ، ال رەسەيدە ءدال سونداي ءۇش قازاق مەكتەبى بوي كوتەرەدى. بۇل باستاما ەكى ەل اراسىنداعى ءبىلىم بەرۋ سالاسىنداعى سەرىكتەستىكتى ودان ءارى نىعايتۋعا باعىتتالعان. قازىرگى تاڭدا قازاقستاندا رەسەيلىك جوعارى وقۋ ورىندارىنىڭ سەگىز فيليالى جۇمىس ىستەيدى. ال رەسەيدە ءال-فارابي اتىنداعى قازاق ۇلتتىق ۋنيۆەرسيتەتىنىڭ فيليالى بار. جاڭا مەكتەپتەردىڭ اشىلۋى وسى ارىپتەستىكتىڭ جالعاسى بولماق.
"جوعارى جانە ورتا ءبىلىم بەرۋ سالاسىنداعى ءوزارا ءتيىمدى ىنتىماقتاستىقتى كەڭەيتۋدى قۇپتايمىن. وزدەرىڭىز بىلەتىندەي، وتكەن جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيليالى جۇمىسىن باستادى. العاشقى ىرىكتەۋ ءوتتى. ءوز كەزەگىندە، قازاقستاندا رەسەيلىك جوعارى وقۋ ورىندارىنىڭ 8 فيليالى جۇمىس ىستەيدى، ونىڭ ىشىندە ماسكەۋ مەملەكەتتىك حالىقارالىق قاتىناستار ينستيتۋتىنىڭ فيليالى دا بار. بۇل وقۋ ورىندارى قازاقستان باسشىلىعىنىڭ كەڭ قولداۋىنا يە. ديالوگىمىزدىڭ كۇن تارتىبىندە التى بىرلەسكەن مەكتەپ، ونىڭ ۇشەۋىن رەسەي اۋماعىندا، ۇشەۋىن قازاقستاندا سالۋ تۇر", — دەدى رەسەي سىرتقى ىستەر ءمينيسترى.
ايتا كەتەيىك، بۇعان دەيىن الماتىدا ەلىمىزدەگى العاشقى رەسەيلىك مەكتەپتىڭ قۇرىلىسى باستالعان ەدى.
