مەملەكەت باسشىسى قاسىم-جومارت توقاەۆ كۋۆەيت ءامىرى شەيح ناۋاف ءال-احماد ءال-دجابەر اس-ساباحتىڭ دۇنيەدەن وزۋىنا بايلانىستى كۋۆەيت مەملەكەتىنىڭ جاڭا ءامىرى شەيح ميشاال ءال-احماد ءال-دجابەر اس-ساباحقا جانە كۋۆەيت حالقىنا كوڭىل ايتىپ، جەدەل حات جولدادى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
كۋۆەيت مەملەكەتىنىڭ ءامىرى شەيح ناۋاف ءال-احماد ءال- دجابەر اس-ساباحتىڭ دۇنيەدەن وزعانى تۋرالى سۋىت حاباردى تەرەڭ كۇيزەلىسپەن قابىل الدىم. شەيح ناۋاف – ءومىرىن كۋۆەيتتىڭ ءوسىپ-وركەندەۋىنە جانە حالقىنىڭ باياندى بولاشاعىن قامتاماسىز ەتۋگە، ايماقتاعى بەيبىتشىلىك پەن تۇراقتىلىقتى ساقتاۋعا ارناعان تۇلعا. قازاقستان حالقى ونى پاراساتتى باسشى، حالىقارالىق دەڭگەيدەگى بەدەلدى ساياساتكەر، ەكىجاقتى ىنتىماقتاستىقتى نىعايتۋعا زور ەڭبەك سىڭىرگەن تاريحي قايراتكەر رەتىندە ءاردايىم ەسىندە ساقتايدى. قارالى ساتتە سىزگە جانە اۋلەتىڭىزگە، سونداي-اق بارشا وتانداسىڭىزعا قازاقستان حالقىنىڭ جانە جەكە ءوزىمنىڭ اتىمنان كوڭىل ايتىپ، قايعىلارىڭىزعا ورتاقتاسامىن، – دەپ جازىلعان جەدەلحاتتا.
