وتاندىق بانكتەر قارجىلىق قىزمەت كورسەتۋ كەزىندە مۇمكىندىگى شەكتەۋلى كليەنتتەردى كەمسىتۋگە جول بەرەدى. بۇل تۋرالى قازاقستان حالىق پارتياسىنىڭ دەپۋتاتى كەنجەعۇل سەيىتجان ايتتى، دەپ حابارلايدى «ادىرنا» ءتىلشىسى.
«ەلىمىزدە 700 مىڭنان استام ادام تۇرادى، ولاردىڭ 400 مىڭنان استامى ەڭبەككە قابىلەتتى جاستاعى ادامدار. مۇگەدەكتىگى بار ادامداردا پلاستيكالىق كارتا بار، ولار وسى ارقىلى اۋدارىم، تولەم جاسايدى، جاردەماقى الادى. ياعني قاراپايىم ازاماتتار سياقتى بانك قىزمەتىنە جۇگىنەدى. الايدا مۇمكىندىگى شەكتەۋلى جاندار ۇنەمى قارجىلىق كەمسىتۋشىلىككە تاپ بولادى،— دەدى ول.
ماجىلىسمەننىڭ ايتۋىنشا، بانكتە مۇگەدەكتىگى بار ادامدار ءتۇرلى كەدەرگىمەن بەتپە-بەت كەلەدى.
«قارجى ۇيىمدارىنىڭ قىزمەتىن وزگەلەرمەن بىردەي پايدالانا المايدى. عيماراتتاردا پاندۋس پەن كوتەرگىش جوق، ال كاسسالاردىڭ تەرەزەلەرى ارباداعى ادام ءۇشىن تىم بيىك. ءموبيلدى قوسىمشالار مەن بانكوماتتار زاعيپ جانە ناشار كورەتىن ادامدارعا ارنالعان تەحنولوگيامەن، ال بانك كارتالارى برايلمەن جاسالعان تاكتيلدى سايكەستەندىرۋ بەلگىسىمەن جابدىقتالماعان»،—دەدى كەنجەعۇل سەيىتحان.
