قازاقستان رەسپۋبليكاسى پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ مۇشەسى، دەپۋتات داۋلەت مۇقاەۆ ءوز پاراقشاسىندا ەلىمىزدەگى الەۋمەتتىك پروبلەمالاردىڭ سىن-cيپاتىن ايتىپ، ماڭىزدى جازبا جاريالادى. دەپۋتات ءوز جازباسىندا قابىلداۋىنا قوعامداعى پروبلەمالاردى ءسوز ەتىپ، ەرەكشە نازار اۋدارىلۋى ءتيىس باعىتتاردى اتادى، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى داۋلەت مۇقاەۆ ءوزىنىڭ قىزمەتى جايىندا مالىمدەمە جاسادى:
- بۇگىن ءماجىلىستىڭ قوعامدىق قابىلداۋىندا تاڭنان كەشكە دەيىن 69 ادامدى قابىلدادىم. اركىمنىڭ ءوز جەكە سۇراعى، جەكە پروبلەماسى بار. 3-4 ادام بولدى، ماعان دەيىن 30 شاقتى جەرگە بارىپ، 20 جىل بويى ماسەلەسى شەشىلمەي جاتىر. ماعان كەلگەندە دە ونىسىن مەن شەشپەيتىنىن ءتۇسىندىم. شىندىق وسى.
كەلگەن ادامداردىڭ باسىم بولىگى سوتتان ادىلدىك سۇراسا، ەندى ءبىر توپ انالار دەپۋتاتتىق ساۋالىمدا كوتەرگەن باسپانا جىرىنىڭ پروبلەماسىن ءتىزىپ الىپ كەلگەن. ۇكىمەت باسىنداعىلار بولسا، ول تالاپتاردىڭ ءبارىن ورىنداۋعا ازىرگە اقشا جوق تەك شاڭىراق پەن باقىتتى وتباسىعا 71.9 ملرد. تەڭگە بولىنگەنىن ايتتى. بىراق، بۇل سوما ازدىق ەتەدى. سەبەبى ءۇي كەزەگىندە تۇرعاندار سانى 640.000 اينالاسىندا. ازايعاننىڭ ورنىنا جىل سايىن كوبەيىپ بارادى. باسقاسى باسقا، باسپانا ماسەلەسى مەنىڭ ەرەكشە نازارىمدا. تۇرعىن ءۇي باعدارلاماسىنا شۇعىل ارادا وزگەرىس كەرەك. ازىرگە باياعى جارتاس - سول جارتاس.
Cونىمەن قاتار، دەپۋتات ءوزى قابىلداعان قوعام وكىلدەرىنىڭ سان-cالالى شاعىمىن جىكتەپ ءوتتى. ونىڭ ايتۋىنشا، اراسىندا ماسەلەسى وتە كۇردەلى ادامدار عانا ەمەس، بوس جۇرگەن جاندار دا بار.
- جەكە قابىلداۋدا بۇدان بولەك، بىرنەشەۋى كرەديت جابۋدى سۇراسا، ەندى ءبىرىنىڭ ارمانى شەتەلدە قىدىرۋ بولدى. كەيبىرى مىندەت قىلىپ، ءدال قازىر 5 ميلليون تەڭگە تاۋىپ بەر دەپ وزىمە ۇرىسىپ كەتتى. تاعى ءبىراز ادام الاياقتاردىڭ قۇربانى بولىپ، 15-20 جىل بۇرىن بەرگەن اقشالارىن قايتارا الماي ءجۇر. ونىڭ قايتۋى دا ەندى ەكىتالاي. ءبىر اپام بولسا، كورشىسىمەن سوتتاسۋدا. بوقتادى دەپ سوتقا بەرگەن. تاعى ءبىر جان كورشىمنىڭ سالعان ءۇيى مەنىڭ جەرىمنەن 3 مەتر اۋلاق بولۋ كەرەك دەپ كەلدى. 3 ادام مۇلدە پروبلەما جوق، ءتىپتى، نە ىستەپ جۇرگەنىن بىلمەيدى. جاي ىشىمدەگىمدى سىزگە ايتقىم كەلدى دەيدى، - دەدى دەپۋتات.
داۋلەت مۇقاەۆ
قر پارلامەنتى ماجىلىسىنىڭ دەپۋتاتى
"ادىرنا" ۇلتتىق پورتالى
