پرەزيدەنت قاسىم-جومارت توقاەۆ ءبىر پالاتالى پارلامەنت قۇرۋ تۋرالى پىكىر ءبىلدىرىپ، بۇل ۇسىنىس بۇرىن باستالعان ساياسي رەفورمالاردىڭ زاڭدى جالعاسى ەكەنىن اتاپ ءوتتى. بۇل تۋرالى اقوردا جازدا، دەپ حابارلايدى "ادىرنا".
مەملەكەت باسشىسىنىڭ ايتۋىنشا، پارلامەنتتىك رەفورما — ەكى پالاتانى مەحانيكالىق تۇردە بىرىكتىرۋ ەمەس.
«مەن بيىلعى جولداۋىمدا ءبىر پالاتالى پارلامەنت قۇرۋ تۋرالى باستاما كوتەردىم.
بۇل وسىعان دەيىنگى ساياسي وزگەرىستەردىڭ زاڭدى جالعاسى دەۋگە بولادى. ءبىز «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن ورنىقتىرا تۇسەمىز، ياعني ەلىمىز پرەزيدەنتتىك رەسپۋبليكا بولىپ قالا بەرەدى.
جاڭا باستاما قوعامدا قىزۋ تالقىلانىپ جاتىر. پارلامەنتتىڭ قۇرىلىمىنا قاتىستى كوپتەگەن ۇسىنىس كەلىپ تۇسۋدە. مىسالى، دەپۋتاتتاردىڭ سانى حالىق سانىنا سايكەس، ياعني پروپورتسيونالدى بولۋعا ءتيىس دەگەن ويلار ايتىلۋدا. مۇنداي ۇستانىممەن قارايتىن بولساق، ولاردىڭ سانى 200 ادامعا جەتەدى. قازىر قوس پالاتادا 148 دەپۋتات بار.
پارلامەنتتىك رەفورما – ەكى پالاتانى جاي بىرىكتىرە سالۋ دەگەن ءسوز ەمەس. مەنىڭشە، دەپۋتات سانىن تىم كوبەيتۋدىڭ قاجەتى جوق. كەرىسىنشە، وڭتايلاندىرۋ كەرەك، پارلامەنتتىڭ جۇمىسىن جەتىلدىرۋ قاجەت. مىسالى، ءبىر پالاتالى جاڭا پارلامەنتتە پرەزيدەنت كۆوتاسى بولمايدى. بارلىق دەپۋتاتتار بىردەي تارتىپپەن سايلانۋى قاجەت. بۇل – الداعى پارلامەنتتىك رەفورما اياسىندا جاسالاتىن اسا ماڭىزدى قادام. مۇنى جاقسى ۇعىنىپ، جۇرتشىلىققا كەڭىنەن ءتۇسىندىرۋ قاجەت»»، - دەدى توقاەۆ.
