ماجىلىستە كۇزەت قىزمەتىنىڭ ساپاسى قىزۋ تالقىلاندى. دەپۋتاتتار مەكتەپتەردەگى قاۋىپسىزدىكتىڭ السىزدىگىن، كۇزەتشىلەردىڭ جاسى مەن بىلىكتىلىگىنە قاتىستى ماسەلەنى كوتەردى، دەپ حابارلايدى “ادىرنا” ۇلتتىق پورتالى.
حالىق قالاۋلىلارىنىڭ ايتۋىنشا، كەيبىر ءبىلىم وردالارىندا ەگدە جاستاعى ادامدار كۇزەتشىلىك قىزمەت اتقارادى، ال ولار توتەنشە جاعدايدا قاۋىپكە قارسى تۇرا المايدى.
“كۇزەتتە 60-70 جاستاعى كىسىلەر وتىر. ولاردىڭ وزىنە كۇزەتشى كەرەك قوي”، - دەدى قر پارلامەنتى ءماجىلىسىنىڭ دەپۋتاتى رينات زايىتوۆ.
ىشكى ىستەر مينيسترلىگى وكىلدەرىنىڭ مالىمدەۋىنشە، كۇزەتشىلەردىڭ جاسىنا قاتىستى ناقتى شەكتەۋ جوق. مەكتەپ ديرەكتورلارى كۇزەتشى تاڭداۋ كەزىندە ءوز تالاپتارىن قويۋعا قۇقىلى.
ء“ار مەكتەپ ديرەكتورىنىڭ كۇزەتشىنى تاڭداۋ كەزىندە بەلگىلى ءبىر تالاپ قويۋىنا تولىق قۇقىعى بار”، - دەدى قر ىشكى ىستەر ءمينيسترىنىڭ ورىنباسارى يگور لەپەحا.
بۇعان دەيىن باق وكىلدەرى مەكتەپتەردەگى كۇزەت ساپاسىن ارنايى زەرتتەپ، باقىلاۋدىڭ ءالسىز ەكەنىن كورسەتكەن بولاتىن. كەيبىر وقۋ ورىندارىندا تۋرنيكەت ورناتىلعانىمەن، بوتەن ادامنىڭ ەمىن-ەركىن كىرىپ-شىعۋىنا ەشقانداي كەدەرگى بولماعان.
قازىر ەلدە 4300 كۇزەت ۇيىمى جۇمىس ىستەيدى. ونىڭ 1600-ىنە قارۋ قولدانۋعا رۇقسات بەرىلگەن. الايدا، ليتسەنزياسىنان ايىرىلعان 1186 كومپانيانىڭ بىردە-ءبىرى قارۋىن مەملەكەتكە وتكىزبەگەن. بۇل قاۋىپسىزدىككە تونەتىن ۇلكەن قاتەر.
قر پارلامەنتى ءماجىلىسىنىڭ دەپۋتاتى جارقىنبەك امانتايۇلى دا تاقىرىپقا قاتىستى ءوز ويىن ءبىلدىردى.
“قولدانىستاعى زاڭدا مۇنداي قارۋلاردى مەملەكەتكە وتكىزۋ قاراستىرىلماعان. جاڭا زاڭ قابىلدانسا، بۇل ماسەلە شەشىلەدى”، - دەدى ول.
دەپۋتاتتار بۇعان دەيىن كۇزەتشىلەردىڭ وزدەرى قىلمىسقا بارىپ، ادام ولىمىنە سەبەپكەر بولعانىن دا ەسكە سالدى. بۇل اسىرەسە، تۇنگى كلۋبتار مەن قوعامدىق ورىنداردا ءجيى كەزدەسەدى.
قاۋىپسىزدىك ماسەلەسى مەكتەپتەرمەن عانا شەكتەلمەيدى. اۋرۋحانا، تەاتر، مەشىت سياقتى ادامدار كوپ جينالاتىن ورىندار دا تەرروريستەر ءۇشىن قولايلى نىسان سانالادى. سوندىقتان دەپۋتاتتار كۇزەت قىزمەتكەرلەرىنە ورتاق تالاپ بەكىتۋدى ۇسىنىپ وتىر.
