ءبىر تاۋلىكتە 200 مىڭ كونسەرۆىلەنگەن قالبىر وندىرەتىن ءوندىرىس ورنى جابىلۋدىڭ از الدىندا تۇر. ەگەر زاۋىت زاڭگەرلەرى مەن شاعىمدانۋشىلاردىڭ تالابى قاناعاتتاندىرىلماسا، «كۋبلەي» كونسەرۆى زاۋىتى جابىلادى. كاسىپورىن عانا ەمەس، وسى زاۋىتقا ەت وتكىزىپ وتىرعان 2500-دەي شارۋا قوجالىعى دا تابىسسىز قالۋى مۇمكىن، دەپ حابارلايدى "ادىرنا" ۇلتتىق پورتالى. بۇل تۋرالى زاڭگەر باقىتجان بازاربەك مالىمدەدى.
ورالداعى «كۋبلەي» زاۋىتى مەن اكىمدىك اراسىنداعى داۋ ەكى جىل بۇرىن باستالعان. اكىمشىلىك كونسەرۆى زاۋىتىنىڭ جانىنان تۇرعىن ءۇي كەشەنىن سالۋعا، قۇرىلىس جۇرگىزۋگە رۇقسات بەرگەن. قۇقىق قورعاۋشى «كۋبلەي» كاسىپورنى مەن ورال قالاسى اكىمدىگىنىڭ اراسىنداعى سوت پروتسەسىنەن cوڭ ءوز ومىرىنە دە قاۋىپ ءتونىپ تۇرعانىن ايتتى. الماتى ماڭىنداعى وليگارحتارعا ءوتىپ كەتكەن جەر تەلىمدەرىن مەملەكەتكە، حالىققا قايتارۋعا قاتىستى ىستەردىڭ باسىندا جۇرگەن زاڭگەر باقىتجان بازاربەك:
«ورالداعى اكىمدىك، جەر قاتىناستارى، ساۋلەت قۇرىلىس باسقارماسىنىڭ ۇستىنەن شاعىمدانۋداعى ماقساتىمىز – تەك زاۋىتتىڭ سانياتارلىق اۋماعىن ساقتاپ قالۋ عانا ەمەس، اتالعان مەكەمەلەردىڭ جەر تەلىمىنىڭ نىسانالى ماقساتىن اۋىستىرۋىنا قاتىستى ارەكەتتەرىنىڭ تەكسەرىلۋىن دە تالاپ ەتەمىز. بارلىق دالەلدەمەلدەردى، 8 توم ايعاق ۇسىندىق. قارسى تاراپ بىردە ءبىر رەت ءبىز تالاپ ەتكەن قۇجاتتاردى ۇسىنعان جوق»، - دەدى.
سونىمەن قاتار، زاڭگەر الپاۋىت زاۋىتتى ساقتاپ قالۋ نەمەسە قولدان جويۋعا قاتىستى پىكىرىن ءبىلدىردى:
«ەگەر ءبىزدىڭ تالىپ-ارىزىمىز قاناعاتتاندىرىلماسا، بەكىتىلگەن پدپ زاڭدى دەپ ەسەپتەلەدى. قازىر قۇرىلىس ۋاقىتشا توقتاپ تۇر. ال، الگى قۇجات زاڭداستىرىلسا، داۋلى قۇرىلىسقا رۇقسات بەرىلىپ، تۇرعىن ءۇي اۋماعى ۇلكەيىپ، سايكەسىنشە، سانيتارلىق قورعاۋ ايماعى ازايادى. كەمىندە 100 مەترلىك سانيتارلىق ايماق بولمايدى. بۇل تۋرالى بىزگە سانەپيدەميالوگيالىق ورگاندار ەسكەرتىپ تە قويعان، «زاۋىت تالابى قاناعاتتانلىرىلماسا، رۇقساتىمىزدى قايتارىپ الامىز».
زاۋىت قولدان جويىلسا، 600 ادام دالادا قالىپ، 2500 شارۋا قوجالىقتارى ەت ونىمدەرىن وتكىزەتىن جەر تاپپاي سەندەلۋى مۇمكىن.
قازاقستانداعى №1-ءشى ءوندىرىس ورنى شەنەۋنىكتەردىڭ زاڭسىز ارەكەتتى، شەشىمدەرىنىڭ سالدارىنان جابىلىپ قالۋدىڭ از الدىندا تۇر، - دەيدى زاۋىت قىزمەتكەرلەرى.
ايتا كەتۋ كەرەك، قازىر جەر تەلىمىنە قاتىستى داۋعا زاۋىت جانىنان سالىنعان ءۇيدىڭ تۇرعىندارى دا قاتىسىپ جاتىر. ولارعا سۋديا "سوتقا قاتىسۋشى ءۇشىنشى تاراپ" دەپ انىقتاما بەرگەن. ولار: "كۋبلەيدە" شارۋامىز جوق، ءبىزدىڭ ۇيىمىزگە كىرۋىمىزگە كەدەرگى كەلتىرمەسە بولدى", - دەپ پىكىر بىلدىرۋدە.
- پرەزيدەنتىمىز «شاعىن-جانە ورتا بيزنەسكە قولداۋ كورسەتەيىك، زاۋىتتار اشايىق» - دەپ ۇندەۋ جاريالايدى، ال ءبىزدىڭ جەرگىلىكتى ورىنداردى وتىرعان اكىمدىك قىزمەتكەرلەرى بار كاسىپتى تۇنشىقتىرعىسى كەلەدى. بۇل كىسىلەردىڭ قازىر كۋبلەيدە شارۋاسى جوق. ۇيلەرگە تۇرعىندار كوشىرىلگەننەن كەيىن زاۋىتتان شىققان اۋاعا تۇنشىعىپ جاتىرمىز» دەمەسىنە كىم كەپىل؟ زاۋىت ەمەس ول كىسىلەردىڭ قاسىنا كوشىپ بارعان؟ ول كىسىلەردىڭ ماسەلەسىن زاۋىتتىڭ قاسىنداعى سانيتارلىق اۋماقتىڭ نىسانالى ماقساتىن وزگەرتىپ، الپاۋىتتارعا ساتىپ جىبەرگەن شەنەۋنىكتەر جاۋاپ بەرسىن!» - دەيدى زاڭگەر.
سونىمەن قاتار، باقىتجان بازاربەك، ءوز ومىرىنە قاۋىپ ءتونىپ تۇرعانىن، وعان وسى سوت پروتسەسىنىڭ قاتىسى بارىن دا ايتتى.
«ءبىر ادام مەنىڭ ومىرىمە قاۋىپ تونەتىنى» تۋرالى ەسكەرتتى. «سەن الماتىدا نەمەسە استانادا ءبىر جاماندىققا ۇشىراپ قالۋىڭ مۇمكىن» دەدى سوتتان سوڭ. مەنى اتۋى نەمەسە ۋلاۋى مۇمكىن. ءتىپتى، پىشاقتاپ كەتۋى دە مۇمكىن. ماعان قانداي قاۋىپ كەلەتىنى تۋرالى سۇراعانىمدا الگى ادام: «مەن تەك ەسكەرتتىم» دەدى. ومىرىمە قاۋىپ ءتونىپ وتىر. بۇنىڭ باستى سەبەبى وسى ورال قالاسىندا بولىپ جاتقان سوت»، - دەدى باقىتجان بازاربەك.
"ادىرنا" ۇلتتىق پورتالى
