الماتى اكىمدىگى قالادا مارقۇم رەسەيلىك ساياساتكەر ۆلاديمير جيرينوۆسكيدىڭ ەسكەرتكىشىنىڭ اشىلۋى تۋرالى اقپاراتقا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
بۇعان دەيىن رەسەيلىك باق الماتىدا مارقۇم ۆلاديمير جيرينوۆسكيگە ەسكەرتكىش اشىلاتىنىن حابارلاعان بولاتىن. لدپر نەگىزىن قالاۋشىعا ەسكەرتكىشتەر 2026 جىلى رەسەي فەدەراتسياسىنىڭ بىرنەشە قالاسىندا اشىلۋى مۇمكىن ەكەنى ايتىلعان.
سونىمەن قاتار، ەسكە الۋ شاراسى مەن ساياساتكەردىڭ تۋعان جەرى الماتىدا ەسكەرتكىشتىڭ اشىلۋى بولاتىنى تۋرالى اقپارات تارادى.
الماتى مادەنيەت باسقارماسى Tengrinews.kz سايتىنىڭ ساۋالىنا بەرگەن جاۋابىندا جيرينوۆسكيگە ەسكەرتكىش ورناتۋ تۋرالى ءوتىنىش تۇسپەگەنىن حابارلادى.
«الماتى قالاسىنىڭ تاريح جانە مادەنيەت ەسكەرتكىشتەرىن قورعاۋ جونىندەگى كوميسسياسى ءتيىستى ۇسىنىستى قاراستىرعان جوق»، - دەلىنگەن حابارلامادا.
ۆلاديمير جيرينوۆسكي 1946 جىلى 25 ساۋىردە الماتىدا كوپ بالالى وتباسىندا دۇنيەگە كەلگەن. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ شىعىس تىلدەرى فاكۋلتەتىنىڭ تۇرىك ءتىلى مەن ادەبيەتى ماماندىعىن بىتىرگەن. سونىمەن بىرگە ول ماركسيزم-لەنينيزم ۋنيۆەرسيتەتىنىڭ حالىقارالىق قاتىناستار فاكۋلتەتىندە وقىدى.
جيرينوۆسكي پارلامەنتتىڭ تومەنگى پالاتاسى قۇرىلعان ءبىرىنشى كۇننەن باستاپ قايتىس بولعان كۇنگە دەيىن رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ سەگىز شاقىرىلىمىنىڭ دەپۋتاتى، مەملەكەتتىك دۋماداعى لدپر فراكتسياسىنىڭ جەتەكشىسى بولدى.
ساياساتكەر قازاقستانعا قارسى مالىمدەمەلەرىمەن ەستە قالدى. اتاپ ايتقاندا، 2014 جىلى جيرينوۆسكي قازاقستان جانە وزبەكستان، قىرعىزستان، تاجىكستان جانە تۇركىمەنستان رەسەيگە قوسىلىپ، ونىڭ ورتالىق ازيا فەدەرالدى وكرۋگىنە اينالۋى كەرەك دەگەن ەدى. وسىدان كەيىن جيرينوۆسكيدى قازاقستاندا، قىرعىزستاندا پەرسونا نون گراتا دەپ جاريالاندى.
رەسەيلىك ساياساتكەر 2022 جىلى 6 ساۋىردە 76 جاسىندا قايتىس بولدى.
